IK PROAT PLAT: Lintjesregen
Loat ik drekst mor helder weden. Eileks bin ik n republikein en mag et koningshuus wat mij betreft opheven worden. De extroa vrije dag is mooi metnommen, mor as ik dommit met pensioen bin, heb ik alle doagen vrij, met dank aan Willem Drees!
Wat veur mij wel weerde het, is de traditie ‘Het heeft de Koning behaagt’. Elk joar kriegen summege minsen die heur belangeloos ienzetten veur de soamenleving, een lintje as waardering. Ik huuf hum niet, mor ik wiet wel dat veul lu der bliede met binnen. En dat gun ik ze van harte. Ze binnen de eulie, die de machine op gang holdt. Al wiet ik ok dat Jan de Roos (Foto Beeldbank Groningen) de mieste lintjes op de borst droeg!
Koningin-regentes Emma is ien 1892 begonnen met de traditie, noadat de personele unie tussen Luxemburg en Nederland opheven was. Veur die tied kon je de ‘Orde van de Eikenkroon’ verdienen, mor dat was toen zo mor doan. t Gaf hiel wat politiek gesteggel om tot n goed veurstel te kommen, want hoe mos et zich verholden met andere onderscheidings en wat mos de noam worden. Pas noa drie stemmings kwam een veurstel deur de koamer en was de Orde van Oranje-Nassau, met 5 rangen, een feit.
Medailles ien gold, zilver en brons met linten in oranje, blauw en wit, dat mos er kommen. De eerste zending versierseln wadden van moatege kwaliteit, mor dat werd gelukkeg loater wel beter. Ze zien der nou goed uut en worden ien mooie deuskes aanboden.
Hoge onderscheidings gingen miest noar bestuurders, politici en militairen en pas noa 1970 kwam Jan-met-e-Pet aan e beurt. Et was 25 joar noa de oorlog en der wadden veul jubilea van verenigings die drekt noa de bevrijding opricht wadden. Ien 1996 kwam der n zesde rang bij, die van ‘Lid’ en de biezundere verdienste veur de gemeenschap werd meer belangriek bij et toekennen.
Nou kin je natuurlek altied discussiëren over wie-wel en wie-niet. Hoe weeg je vrijwilligerswaark en wanneer hei-je genog doan. Je moeten doarom veurdroagen worden deur de omgeving en voak binnen er dan ok meerdere clubs die de veurdracht steunen. Mor dan. Hol et mor es bij de kandidoat weg, want die mag niks deur hemmen vanzelf. Et moet n surprise weden as de burgervader zomor aan e deur stijt, of dat de persoon ien kwestie noar et buurthuus lokt is en dat doar dan de hiele femilie op zien Poasbest op e eerste rij zit. En met n veurdracht bist er zo mor niet. Dan moeten de burgemeester, de commissoares en de minister der nog noar kieken. Deurgoans volgen die leste twee et besluut van e eerste. Tenzij …
Dit joar was er ophef omdat de minister niet tekenen wol. Et waark van e genomineerden ging tegen heur beleid ien. De hiele Tweede koamer viel over heur hinne, mor ze hiel voet bij stuk. Uuteindelek most er van hogerhand iengrepen worden, om t lintje toch toe te kennen.
Me dunkt, dan is de lol der wel n bietje òf. As ik wieten zol dat er ok mor 1 persoon was die me de waardering niet gunde, dan was de medaille veur mij van blik en beleefde ik der weineg plezier aan. Wie zien vrije tied besteedt aan et helpen van n ander, die doarmet veuruut kommen kin, moet stimuleerd en waardeerd worden. Plunten, die dat ien e war schoppen en der veur zörgen dat minsen niet meer helpen willen, moeten we mor n pooske noar n eiland ien e Poolzee sturen. Kinnen de verhitte gedachten een bietje òfkoelen.
Loat je der niet van weerholden om wat goeds veur n ander te doen. Ien stilte waarderen is ok waarderen en e muite weerd!
Geert Zijlstra
Mientje: “Die man lopt tröts met zien lintje op e borst!”
