Scheuveln

De scheuvels kinnen weer ien t vet en wel wiet veur hoelang.

Dizze winter hadden we twee doagen de kaans om op t ies te stoan en de scheuvels onder te bienden en dan ok nog allinneg veur woaghalzen. 

De gewone iesboanen wadden niet open. De boanen woar mor n heul dun loagje wotter op moet, dat dan vot bevrust, doar kon je wel terecht. De iesmeesters binnen dan wel de heule nacht ien e weer om een dun loagje ies te loaten groeien. En dan kon der allinneg smörgensvroeg scheuvelt worden, smiddag was t ies al weer wotter.

Op e Marumerlage werd ok scheuvelt en drok dat doar was. De autos stonden langs de heule weg dubbel parkeerd.

Zulfs RTV Noord wa-der. t Is ien dis tied wel belangriek nijs a-der scheuvelies is. Wanneer gebeurd dat nou nog, scheuveln op natuuries, dan moe-je der vanzulf bij wezen as n goeie nijsbrenger. t Wadden mooie beelden, vol met enthousiaste minsen, ze moeken mooie lange streken met de handen op e rug over t gladde ies. t Zunnetje der bij, prachteg! Nog mor rondje en dan nog mor één. Ja en dan gijt et mis en RTV Noord wa-der getuge van en alle volgers vanzulf ok. We konden allemoal zien hoe ze breed lachend deur t ies zakkende. t Kwam niet eens tot de knijen, mor nat wadden ze wel.

Op e kerstmarkten veureg joar december zag ik allemoal kerststukjes die op van die olderwetse holten scheuvels moakt wadden. Hartstikke leuk, mor zol dat et lot weden van onze scheuvels, want et bestoan van e iesboanen is n heul ongewisse zoak as t zo deur gijt met onze winters. t Beste is om skeelerboanen te moaken en dan doar ien e winter een dun loagje wotter op, ien e hoop dat we scheuveln kinnen.

Dat binnen ze ok van plan ien Tolbert, harstikke goed idee volgens mij.

Een heule generoatie kin niet eens meer scheuveln. Gelukkeg krigt mien kleindochter van zeuven, één keer ien e week scheuvelles ien Kardinge. t Is n oardegheid zo as t wichtje al scheuveln kin, meschien wordt ze wel de nije Femke Kok of Marijke Groenewoud. Zeker en wis dat oma dan, ien n vol Thialf, op e tribune zit met n toeter en n spandoek!

Scheuveln op e grode meren of voarten zoas we vroeger konden, zie ik niet zo snel weer gebeuren. Ik wordt votdoalek nostalgisch as ik der aan denk, wat was dat toch fantastisch mooi. De heule dag wadden we op t ies totdat et donker werd, dan gingen we pas noar huus, deur en deur verkleumd. Moeke zee “goa mor veur de kachel zitten”, nou dan begon de ellende pas goed, oh wat kreeg je dan zere tonen en vingers. Mor t was zeker alle pien weerd.

Elfstedentocht en NoorderRondRit heuren echt tot et verleden. We zallen onze kiender vertellen moeten wat en hoe dat was. We reden toertochten noar t Leekstermeer en dan n rondje over t meer en weerom. En onderweegs warme poeiersukkeloa, heerlek.

Opstappen ien Gerkesklooster en dan over de Lauwers scheuveln noar Zoltkamp en weerom, dat was best wel ver en nou is t een heule mooie herinnering.

Wieten jim wel dat er een “Schaatsmuseum” is ien Sappemeer? Kiek mor es op Groningerschaatsmuseum.nl

Job Nienhuus, die bekende weerman, de man met de grode snor uut Usquert, was lest op televisie. Hij het zien holten deurlopers, woar der drie keer de Elfstedentocht op reden het, aan t “Schaatsmuseum” schonken.

Loaten we hopen dat et scheuveln op natuuries gien museumstuk wordt.

Leneke Struiksma

Mientje: ‘Die vent is n vremde scheuvel!’