Bethlehem
Ien dizze tied veur Kerst goan we groag weer op weg noar Bethlehem en doarveur hoeven we gelukkeg niet heulemoal noar t Midden Oosten. Dichtbij, ien onze pervinzie, hemmen we der ok één! Bethlehem is n buurtschap bij et ploatske Rottum op t Hogeland. t Is n wierde met twee boerderijen en één van die grote Grunneger boerderijen hiet Bethlehem. Dan willen we natuurlek wieten hoe dat zo kommen is.
Aan t enne van e twaalfde eeuw wa-der ten noorden van Rottum een mannenklooster. Een heul groot klooster met veul land. Ten westen van Rottum, op n wierde, werd n groot uuthof Bethlehem -dat is n boerderij- bouwd,. Op een gegeven moment kommen der veerteg nonnen ien t mannenklooster van Rottum te wonen. Alle monniken hemmen vanzulf de gelofte van kuisheid òfleid, mor toen die nonnetjes kwammen, wadden ze dizze gelofte snel vergeten. Der werden zulfs lutje podjes geboren ien t klooster. Dit kon nooit goed goan en de abt besloot dan ok om de nonnen vot te sturen. Der most een enne kommen aan de onzedelekheid en dus werden ze verbannen noar uuthof Bethlehem. De nonnen moeken der n nonnenklooster van en bouwende ok nog n kapeltje op de wierde. Je zollen meschien denken dat die nonnen wel n gezelleg en makkelek leventje hadden, mor niks is minder woar. t Was n moeileke tied, met hard warken, veul oorlog en plunderingen deur langstrekkende soldoaten. De nonnen werden zelfs mishandelt en verkracht. Summege nonnen gingen der vandeur met n soldoat. Uuteindelek wadden der gien nonnen meer over en de uuthof met kapel roek ien verval.
Et dut denken aan onze tied. Op veul plakken oorlog, mishandelingen, aansloagen, verkrachtingen, en zoveul soldoaten die nooit meer thuus kommen. t Gijt niet goed met dizze wereld, want mannen as Poetin, Trump, Erdogan, Kim Jung Un -we kinnen ze zulfs numen uut ons eigen land- sloagen op hol. Der moet één kommen die weer orde op zoaken stelt en de minsen vertelt woar t werkelek om gijt. Veural ien dizze tied van Kerst willen we t allemoal zo groag anders. We willen vrede op aarde! Mor ja, wel komt die boodschap en et nije licht brengen?
Rond dizze tied kin je ien e kroamkes op gezellege kerstmarkten, mooie kerstversiering of winterspul kopen. Alles om t ien en om huus zo gezelleg mogelek te moaken. Meestieds stijt er op zo’n markt ook n kerststal, die ons denken dut aan e geboorte van Jezus ien Bethlehem, met dieren, n kribbe en t kiendje Jezus. Die moet ons hoop brengen. Mor vrede is niet te koop doar moet je soamen aan waarken.
Een poar joar leden was er ien Doezum een kerstwandeling. Der was veul belangstelling en ien groepkes gingen we op pad. De route liep deur t dörp en onderweegs werden op mooie plakjes delen van t kerstverhoal verteld. Zo kwammen we bij n poar engeln langs en vanzelf wadden de herders met de schoapen der ok. De drie wiezen uut t oosten vertelende ons ok van alles, mor ze kroamende, noar mien idee, allemoal onzin uut. Zo wies wadden die drie wiezen uut Doezum niet. Mor we mochten deur de sterrenkieker kieken om de ster van Bethlehem op te sporen. Jammer genog was t veul te bewolkt, dus gien ster zien!
Aan t enne van e wandeling kwammen we aan ien Bethlehem. We liepen bij minsen t hiem op en werden gastvrij ontvangen. Vuurtonnen wezen ons de weg noar n schuurke achter op t hiem, doar had et wonder ploatsvonden. Tussen t stro en hooi zatten een jonge pabbe en mamme met heur pasgeboren zeuntje. De koe en de ezel ontbraken niet. Veur de stal lagen stropakjes ien e rondte, met ien t midden n vuurkörf. Een gezellege en warme aanblik met warme poeiersukkeloa.
Ik ston vol aandacht noar lutje podje te kieken. Eenklein jonkje wol mij wiezer moaken, meschien vond er wel dat ik lang genog noar de baby keken had. Hij trok mij aan e hand en zee; “Dit is niet de echte Jezus heur.”
Wat mooi niet, de onschuld van zo’n jonkje. Hij leufd ien t goede van e minsen en is zich nog niet bewust van de hoge heren en vrouwlu, die de wereld op heur menier regeren willen, met alle gevolgen van dien. Loaten we hopen, dat et jonkje nog lang ien zien vredege wereld leven kin!
Leneke Struiksma
Mientje: ‘Noamens de schrievers van “Ik Proat Plat”, mooie feestdoagen en tot ien 2025!’
