Segoar
Een rookwedstried. Ien e tegenwoordege tied kinnen we t ons nauweleks veurstellen! Op dit moment wordt roken ontmoedegd, we wieten ienmiddels allemoal dat roken absoluut niet gezond is. Mor vroeger was dat aans, getuge de spreuk: ‘Het is geen man als hij niet roken kan’. Ien meneg café of buurthuus werden dan ok rookwedstrieden holden. Elke deelnimmer kreeg n segoar van dezelfde òfmetings en most dan wachten tot et teken ‘vuur’ geven werd om dan allemoal tegelieks de segoar aan te steken. Et duurde dan ok niet lang of et café stond blauw van e rook, mor dat kon gieneen wat schillen. Der wadden twee soorten wedstrieden, t ging om de langste askegel of om et zo lang mogelk aan e proat holden van e segoar. Ien mien beleving kwam de eerste vörm hier minder voak veur as de tweede. Je deden pas goed met as je n askegel hadden van over de 3 centimeter, de absolute kampioenen hadden der meer as 4. Viel de as van e segoar, dan kon je hum ienlevern en dee je niet meer met. En zo bleef degene met de langste askegel as vanzulf over en werd uutroepen tot winnoar. Et schient dat et wereldrecord, veur zover doar sproake van is, 10 centimeter is. Meer as as segoar dus. Et was zoak om de segoar recht op te holden, aans dee de zwoartekracht zien waark en was je snel uutspeuld. Je mosten dus onder de segoar krupen om een hoal te doen. De lengte van e kegel werd meten deur de peuk te meten, zodra de kegel der vanòf valen was. ’t Verschil met de ongerookte segoar was dan de lengte van e askegel.
Bij de tweede vörm ging et er om, de segoar zo laank mogelk aan e proat te holden, as dat lukte was je de winnoar. Je mosten dus gien grode hoalen doen, want dan was je snel aan et enne en dee je niet meer met om e priezen. t Was dus zoak om zo zuneg mogelk te zugen, woarbij je de segoar wel aan e proat holden mosten. Want as de segoar uutging, werd je geliek diskwalificeerd en ging er n groot gejuich op. Gelukkeg wa-der ok altied nog n poedelpries. Dudelk gien ervoaren roker zo’n man, want vrouwen deden niet met, het was echt n mannensport. De segoar most zo laank mogelek branden blieven, dus as je bij et peukje aankwammen, branende je host je lippen. Summegen stakken dan n lucifer ien e peuk, kon je nog net even langer deurgoan zunder je vingers of lippen te verbranden. Een goeie bolknak kon je zo twee uur aan e proat holden, de kampioen ging doar voak nog net even over hinne. En jim snappen dat de spanning toenam as de twee uren host veurbij wadden, menigeen probeerde de rokers uut heur concentroatie te hoalen. De mooiste verhoalen gingen dan over toavel en der werden moppen tapt. t Was dus zoak om meer aandacht veur je segoar te hemmen dan veur de minsen om je hinne. Zie je segoar mor es aan e proat te holden, allinneg de woare kampioenen konden dat. De kastelein had et er voak best met, want er werd niet allinneg rookt, der werd ok steveg dronken.
Tussendeur most je wel es noar de WC, om te veurkommen dat er vals speuld werd, ging der een jurylid met noar de WC. Bij pissen was dat gien probleem, vanachter keek et jurylid toe en hing de segoar voak ien e mondhoek. Mor uut verhoalen moak ik op dat et ok n keer misging. Want één van de deelnimmers most poepen en doar wil je gien pottekiekers bij. Der ging wel n jurylid met en veur die der op verdacht was, was de poeper met segoar achter de deur verdwenen. De man had kennelk last van opstoppings, want et duurde nogal even. Toen hij uuteindelk noar buten kwam met n dikke rooie kop, had er de segoar nog ien e mond. De man ging t café ien, mor één van de andere deelnimmers vertrouwde et niet en beschuldigde de man van valsspeulen. De segoar was minder ver oprookt dan toen hij noar de WC ging. De man ontkende vanzelf, mor één van de juryleden toog noar de WC en wat trof hij doar aan? Een drievende sigoarepeuk! De zundoar werd drekt diskwalificeerd, beroep was niet mogelk. De man droop òf met et schoamrood op e koaken.
Eelke Solle
Spreuk Mientje: ‘Hest wel rekkers ien e broekspiepen?’
