Oppe fiets
t Allereerste vervoermiddel veur mijzulf, wat ik mij herinnern kin, was n autoped. Niet zukken as de kiender nou hemmen, mor n grode met kruiwoagenbanden. Ik kon der best hard op. Mien eerste fiets kreeg ik van mien olders toen ik ien e tweede klas van e legere schoel zat, ik zal n joar of zeuven west wezen. Ik denk dat et gien nije fiets was, mor n òfdankertje uut e familie. Dat moakt niks uut, ik wa-der bliede met.
Dat betekende ok dat ik toen op fiets noar schoel mocht. Veur die tied brocht Moeke mij, mor de meeste keren gingen wij lopend met alle buurkiender. En sums ging ik op mien autoped, dat ging al veul sneller dan lopen. De route noar schoel ging van de Langeweg, woar wij woonden, noar de Bovenweg ien Grodegast. Doar op die driehoek was toen nog n soort heuveltje ien e weg en veur mien gevoel “doalde” je òf noar de Bovenweg. (Foto: met huus van Roelf Pantjes) De Bovenweg was ien e joaren zesteg nog n smal wegje met aan weerskanten bomen en hier en doar n boerderij. Ik kin me ok niet herinnern dat er veul auto’s laangs reden, dus t was wel veileg dat we doar liepen of fietsende. Dan links òf de G.P. Beukemaloan ien, rechts de Middelloan op en we wadden op schoel. t Zal nooit meer west wezen dan twee kilometer. Toen ik ien e hoogste klassen kwam, kreeg ik weer n “nije” fiets. Mor op die nije fiets, woar ik eerst ok heul bliede met was, ging pabbe van die dikke voetsteunen op moaken. Want ik most mien broerke metnimmen noar schoel en dan was t beter dat er voetsteunen veur t jonkje opzatten. Ik ben heul wies met mien broerke, mor veul minder wies was ik met die voetsteunen.
Heul veul fietsen verder trap ik nog steeds op n gewone fiets. Eerder vloog ik elkeneen veurbij, mor nou met die elektrische fietsen goan ze mij allemoal veurbij. Dan hemmen we et nog niet eens over die fatbike, die goan ja nog veul harder.
Van dichter Al Galidi uut Irak las ik n gedicht over de fiets. Kwam hier op del: t Eerste wat je leren is lopen, dan fietsen. En dan de fiets verliezen of de fiets wordt stolen, want hij wacht niet op je. n Poar weken leden was de Zwemchallenge van Zoltkamp noar Grunnen. Zwemmen ien t Reitdiep en ien e grachten van Grunnen veur n goed doel. Op TV Noord zag ik dat de grachten eerst veileg moakt werden. Ongelofelek hoeveul fietsen der uut toakeld werden. Doar belanden woarschienlek n groot deel van al die stolen fietsen. Ik ben mien eerste fiets ok n week kwiet west. t Was op n zotterdag, der was scheuveln veur de televisie, woar wij met zien allen noar zatten te kieken. Meschien kinnen jim de noamen nog wel: Ard Schenk, Kees Verkerk, Jan Bols. Toen we thee drinken zollen, had moeke de sukker op. Dus most ik gauw noar de krudenierswinkel van Job Hielema, 50 meter verderop. Snel op e fiets om sukker, zunder noadenken ben ik hardlopend weerom komen. Ik wol niks missen van t scheuveln. n Week loader kwam ik weer ien e winkel om n boodschapke veur moeke, Hielema zee toen tegen een andere klant “Nou stijt hier de heule week al n fietske, van wel zol die toch wezen?” Dat wis ik wel, die was van mij! Ik ben stiekem op e fiets weer noar huus goan. Zol ik mien fiets nou lös bij de winkel henzetten, dan wa-der vast en zeker vot.
Der binnen meer fietsen ien Nederland dan ienwoners. Ik heb allinneg al vier fietsen. Boven stijt er één; hoe hard ik ok trap hij gijt niks veuruut. Dan mien gewone fiets, mien snelle racefiets met helm en de mamafiets met zitjes veur en achterop om de kleinkiender noar schoel te brengen. Wat dat betreft verandert er niet veul, ik zit nog steeds op e fiets om kiender noar schoel te brengen.
Volgens t nijs trekken der op t ogenblik aal meer toeristen noar Grunnen. t Wordt drokker op e fietspoaden, wat uutbreiding zol niet verkeerd wezen. Wat mooie fietspoaden aanleggen is mien idee, bijveurbeeld bij t Wolddiep, t Olde Diep of bij de Lauwers laangs.
Leneke Struiksma
Mientje: ‘Op n olle fiets moet je t leren!’
