Trekkertrek
Veureg joar juni was et de 25ste keer Trekkertrek ien Seballeburen.
Trekkertrek is n wedstried woar trekkerliefhebbers op n trekker met aanhanger rieden. Ze leggen een parcours òf van zo’n 100 meter en ze kriegen aal meer gewicht op e aanhanger, logisch dat et dan moeileker wordt om veuruut te kommen. t Gijt er om welke trekker met bestuurder de aanhanger t verste trekken kin. Komt de trekker uuteindelek tot stilstand, dan wordt de òfstand meten en heul simpel; wie t verste trekt is de winnoar.
Ze begunnen op vrijdagoavend te trekken en noa tied feesten ien e grode feesttent. Op et evenement kommen wel zo’n 1500 tot 2000 minsen òf.
Zotterdags goan ze weer verder met trekken en noa òfloop weer de feesttent ien. De biertap het et drok had, t was ok heul warm weer die 25 ste keer.
Ok aan e kiender wordt docht. Op t springkussen kinnen ze zich uutleven en er wordt n kleintje trekkertrek op skelters organiseerd.
Eerdere joaren was et trek-terrein aan e Londense Stroatweg, mor sinds n poar joar wordt et holden op e iesboan achter de kroeg t Haventje.
Loonwarkers uut e buurt moaken de boan trek kloar. Op et nije plak binnen der twee boanen noast mekoar, dat moakt et veur t publiek nog leuker.
De deelnemmers kommen ien verschillende klassen uut: standaard klasse, sportklasse, supersportklasse en de oldstockklasse. Ien 2023 kwammen der zo’n 200 trekkers. Veul boeren en loonwarkers uut e wiede omgeving kommen met heur trekker noar Seballeburen.
Deelnemmers die uutkommen ien e sportklasse kommen voak wat verder vot. Dat binnen ok de trekkers die der specioal veur bouwd binnen.
t Enige woar de trekkerchauffeur aan voldoen moet is dat er n trekkerriebewies het.
Vanòf jannewoarie 2024 is de achtkoppege organisoatie al weer ien e weer met uutneudigingen versturen en t neudege papierwark veur de 26e Trekkertrek.
Zo gauw as t weer et toelet goan ze met de boan en alles der omhen aan e gang.
Nou wieten we allemoal dat et veurjoar strontnat was. En de trekkertrekboan was veranderd ien een iesboan, et most allinneg nog vriezen dan kon je der scheuveln.
Op zo’n nat stuk land is t gien doen om met trekkers rond te rieden, dat wordt n modderpoel.
Dus is t heule gebeuren is uutsteld noar 20 en 21 september. Hopelek is t dan wat dreuger en zien we de dikke zwarde rookplumen uut e uutloaten kommen. t Zol n verschrikkeleke teleurstelling wezen veur alle liefhebbers, chauffeurs, publiek en feestgangers as et niet deur goan kin om t weer.
Nou had ik wat minsen vroagt om starke verhoalen over et trekkertrek gebeuren.
Ik docht dat is net as met de verhoalen van sportvissers, de vissen worden aal groder, de verhoalen aal starker.Mor de boeren en loonwarkers binnen niet zukke vertellers, ze kniezen wat en zeggen dat et weer n mooi feest was. As de trekker weer veileg thuus is, störten ze zich ien t feest en hoe ze thuus kommen binnen, wieten de meesten niet meer.
Wel heb ik heurd over n deelnemmer, die jankte as n klein kiend omdat er de eerste pries wonnen had, zo bliede wa-der.
Mocht je nou niks aan Trekkertrek vienden, dan kin je op 21 september ok nog noar t Barontheater ien Opende. Doar wordt dan deur de vertellers van het Vertelcollectief Kom op Verhoal een vertelveurstelling geven. Verhoalen over t verleden en heden van t Westerkwartier. Koarten kin je bestellen via de website www.barontheater.nl van t Barontheater.
Leneke Struiksma
Mientje: ‘En de boer, hij ploegde deur!’
