Van drafboan noar sporthal
Ien 1978 kreeg Zuudhörn een nije sporthal met de biezundere noam ‘Quicksilver S’, woarbij ok opvallend was, dat et bouwd worden kon uut n legaat. De stienrieke Zuudhörner Johannes Smit nam een bedrag op ien zien testament, dat deur de gemeente besteed worden most aan ‘ de sportieve ontwikkeling van de bevolking’. Wie was die meneer Smit, hoe werd er zo riek en woarom kreeg de nije sporthal de noam Quicksilver S?
Johannes Smit was de zeun van Kornelis Smit van e gelieknoamege handelsonderneming. Opricht ien `1881’ aan e Hooiweg ien Zuudhörn. Et bedrief, dat ok wel de ‘Strooschuur’ nuumd werd, handelde ien stro en hooi. Stro werd met peerdenwoagen noar Zuudhörn brocht en ien dikke boalen perst, die met de trein noar Duutsland en strokartonfabrieken brocht werd. Ien 1923 brak er brand uut ien één van e loodsen van Smit, die vol stond met peerden veur de handel. Met man en macht werd probeerd om e schuurdeuren open te kriegen en de dieren te bevrijden. Dat lukte wel, mor de peerden sloegen op hol en vlogen langs de spoorboan richting Gruupskerk. De brand was enorm fel en et duurde wel 3 weken, veurdat de brandweer ‘brand meester’ gaf.
Rond 1910 had Johannes et bedrief van zien pa overnommen. Hij was doar altied al omringd met trekpeerden, dressuurpeerden en springpeerden, mor zien aandacht ging veural uut noar drafpeerden, want Johannes had n veurliefde veur snelheid. Hij hiel van deurpakken, hij begon ok nije bedrieven en werd zo steenriek. Hij had n neuske veur succes.
Ien 1920 begon er soamen met J. Bolwijn een droaverstal, met de noam ‘Stal Vitesse’. Met één van zien eerste droavers Nobillissimus ree en won er zien eerste koers. Hij kreeg de smoak te pakken en reed as ‘Heerrijder’ zelf ok voak ien priezen. Hij werd bestuurder ien e peerdensport en begon ien e joaren derteg met n peerdenfokkerij ien Zuudhörn. Aan e Oostergast kwam n landgoed van wel 21 bunder en doar liepen noast koeien en schoapen wel 60 peerden. Zien eerste fokmerrie Alinda, leverde t veulen ‘Gruno’s Gregor’ en doarnoa werden er meer dan 200 peerden van stoeterij Smit ien t stamboek ienschreven. Bij peerden bepoalt et joartal de eerste letter van e noam van t veulen en Smit gaf zien veulens groag noamen van vogels. Zilverreiger S, Kievit S en Nestkuiken S binnen mooie veurbeelden, mor toen Smit ien 1949 bij de letter Q uutkwam, had er n probleem. Hij had veur Quetzal S kiezen kind, mor et werd Quicksilver S.
Smit verkocht Quicksilver S as veulen veur 700 gulden en t peerd kwam bij diverse trainers op stal. De hengst was onwilleg en liet zich niet dwingen, doardeur kwam zien klasse niet drekt uut e vaarf. Toen Quickie 9 joar was, kocht Smit et peerd weerom veur 9000 gulden en de verkoper docht dat er een prima slag sloagen had. Smit dee et nobele dier ien training bij pikeur en trainer Jan Wagenaar senior. Die ontdekte al rap, dat de droaver n hekel aan trainen had. Hij liet Quicksilver doarom de hiele dag buten lopen, woarbij et beestje zichzelf trainde en sums duvels metdroafde met e andere peerden op e boan. Zo kwam Quicksilver S ien vörm.
Algedureg presteerde Quicksilver S beter ien drafwedstrieden en vanòf zien twaalfde jaar won er host alles wat lös en vast zat. Meestieds was Jan Wagenaar junior pikeur, mor ok senior – olle mannen onder mekoar- vuulde et peerd goed aan. De grootste overwinning was ‘De Grote Prijs der Lage Landen’ van 1964, toen er als 15-joarege veteroan won van e jeugd. Hij dee zien bijnoam “Keizer van Otterlo” eer aan en heerste van zien twaalfde tot en met zien zeuventiende joar over Nederland. Hij won over de 300.000 gulden aan priezengeld, dus Smit had n beste koop doan. De olle boas kwam toen al niet zo voak meer bij n koers, want hij kon e spanning niet meer aan. Ien 1966 ging Quicksilver S. met pensioen en et dier overleed ien 1970 aan n hartaanval, tot groot verdriet van zien eigenoar en trainer.
Met de bedrieven van Smit liep et ok niet best òf. De klad kwam ien e strohandel en e strokartonfabieken en vrachtwoagens werden verkocht. De stoeterij, de liefste hobby van Smit, bleef et langste bestoan, mor ok de peerden werden et joar veur zien overlieden in 1968 verkocht. Smit was trouwd en kienderloos. Ien zien testament werd Quicksilver S toewezen aan e familie Wagenaar en kreeg zien geboorteploats Zuidhorn ƒ 133.500 toebedeeld veur sportdoeleinden. Uut dankboarheid werd de Zuudhörner sporthal, dat ien et Joh. Smitpark bouwd werd, vernuumd naar et wonderpeerd Quicksilver. Jan Wagenaar junior, de leste eigenoar van Quickie, opende de hal ien augustus 1978.
Geert Zijlstra
Mientje: ‘As t peerd dood is, komt hoaver te loat!’
