Barkmeijer 150 joar ien Stroobos
Host 150 joar lang was de helling van Barkmeijer een begrip ien et tweelingdörp Stroobos-Gerkesklooster. De waarf bleef lang ien bezit van e familie Barkmeijer mor werd ien 2019 opkocht deur TB Shipyards. Et bedrief was beeldbepoalend aan et Hoendiep en as waarkgever belangriek veur de wiede omgeving. Op t heden is t oardeg stil op e waarf, et geklop van veurhoamers is verstild en e sensatie van e dikke golven as n boot deupt wordt en ien et wodder glidt, missen we al n pooske. Ik mog doar vroeger groag noar kieken.
Ien 1850 kocht Gerrit Jans Barkmeijer veur zien zeun Douwe Gerrits een scheepstimmerbedrief van Bijleveld ien Stroobos. Douwe was opgroeid op e waarf van zien pabbe ien Briltil. Doarveur hadden de Barkmeijers al schepen bouwd op e Leek. Loater zollen verscheidene telgen uur et geslacht Barkmeijer ok begunnen met n waarf, zoas ien Dokkum, Hoogkerk of Birdaard.
Dat n waarf een succes werd, was gien wonder vanzelf, want 150 joar leden was et vervoer over wotter veul belangrieker as nou. Snel, veul vracht verzetten, bieten, groan, turf, ging et vlotst per boot.
Laangs et wotter schoten scheepshellingen as paddestoelen uut e grond, om boten te bouwen en te repareren.
Et Hoendiep was n belangrieke voarweg en doarom zat Barkmeijer eerst al ien Briltil. De overnoame ien Stroobos was logisch. Et lag op n kruuspunt van voarwegen en dan was er ok nog de grensovergang tussen Grunnen en Friesland.
Ien 1832 was er al sproake van n helling met timmerbedrief aan e reed aan e Oude Vaart ien Stroobos. Barkmeijer betoalde destieds de somma van 900 gulden veur ‘Eene huizing met scheepstimmerwerf met erf’. Al vlot noa de koop werd er n extra stuk laand en n huus opkocht, drekt noast de waarf. Zeun Douwe Gerrits kwam doar te wonen en stichtte en flink gezin. Loater kocht et bedrief nog meer panden aan e Hellingstraat ien e omgeving van e waarf. Deels werden de huuskes bewoond deur personeel van Barkmeijer.
Eerst bouwde Barkmeijer holten schepen veur et vervoer van turf of klei, die op terpen òfgroaven werd. Ok verhuurde Barkmeijer proamen aan schippers veur et vervoer van stro, eerappels, dakpannen en wat al niet.
Langskommende schippers stoppende ok ien Stroobos veur kleine reperoaties as ze doar toch wadden. Onderhold was duur, bleef voak achterwege en dan zonk de boot op t lest noar de bodem van e voart.
Douwes zeun Tjipke nam et bedrief in 1888 over van zien pabbe, juust ien n tied dat e scheepvoart wat achteruut ging. Hij was ‘veurzichteg’ en bleef lang holten schepen bouwen terwiel de concurrenten al met iezer en stoal warkende. Zien zeuns Tammo en Gerrit sturende pabbe op n dag noar Stad en sleupende de olle helling. Zij wollen moderniseren en toen pabbe weerom kwam, was et kwoad geschied en konden ze aan e slag met iezern boten.
Tammo was zoakelek goed bij en Gerrit was de ‘uutviender’. Ze bouwende beurtschepen en opduwers en specialiseerden zich ien e binnenvoart. Et ging goed, want rond e joaren twinteg warkende der al wel 40 man bij Barkmeijer. De meeste arbeiders wadden hondstrouw en bleven lang bij de boas, dat bleef tot aan t enne van t bedrief et geval.
Rond 1957 nam zeun Tjipke, die flink interesse had ien motoren, et stokje van Gerrit over. Et ienbouwen van motoren ien bestoande schepen bleek n golden greep en wederom ging et Barkmeijer flink veur de wiend. Boten werden alpmoar groter zeker ok omdat de kustvoart noar de Baltische Zee en de Oostzee al mor belangrieker werden.
Ien e joaren 80 ging Barkmeijer Stroobos soamen met n poar andere Friese scheepvoartbedrieven waarken onder de noam Frisian Shipyards. Zo kon elk zich op zien eigen kunde richten. Toch kwam er ien 2019 een enne aan t familiebedrief en werd et overnommen deur Bodewes een andere bekende noam ien e scheepvoart.
Geert Zijlstra
