De grootste HD-motorshop van Nederland stond 30 jaar geleden in.....

Afbeelding
Ik proat plat

Lange tied was er ien Pieterziel een normoale smederij. Bij smid Nieborg (foto: Beeldbank Groningen, Smederij rond 1900) kon je veur van alles, van fietsen tot wasmachines, terecht. Mor net as bij de andere winkels ien et dörp ging et bij gebrek aan klandizie ter ziele. Ien e joaren tachteg, werd et bedriefspand overnommen deur n hiel biezundere onderneming, de HD-Smederij. Dat bedrief verkocht motoren en motoronderdelen van et merk Harley-Davidson, n motormerk dat toendestieds ok al zeer ien trek was bij “motormuizen”.

Ien 1982 moakte Bert Kromme van zien hobby, motoren repareren, zien waark en verscheen er op e gevel van e olle smederij de tekst ‘HARLEY DAVIDSON’. Bert had zien passie aarft van zien opa, die ok al aan Harley’s om knuuterde en Bert had er zelf ok al hiel wat weer op e weg holpen. En zo kwam et dat er op meneg zotterdagmiddag een mooi zootje motoren deur Pieterziel knapte, op zuuk noar n specioal onderdeeltje of meschien wel noar n hiele nije motor. Een ritje noar Pieterziel was veur Harley-bezitters sowieso de muite weerd. Bij de HD-Smederij kwam je ‘soulmates’ tegen met woeste boarden, lange hoaren en leren jackjes en n diepe liefde veur motoren.

Bert kon niet wachten tot er achttien joar werd en zelf op n Harley rieden mog. Hij had e kont nog niet op t zoadel of hij wist: ‘Dit is verslavend voor mij!’ Toen et Algemeen Dagblad in 1987 vroeg woarom n Harley…., barstte de liefhebber lös: ‘Een Harley is niet te vergelijken met andere motoren, ze zitten anders in elkaar en zitten vol leven!’.

Veul motorliefhebbers delen dat gevuul en priezen et merk om zien stoere uterlek, betrouwbaarheid en kleuren. Veural de Choppers, die et miest wild uutdöst binnen met toeters en bellen, kriegen veul aandacht.

En juust veur die toeters en bellen mos je ien e HD-Smederij weden. Omdat Bert n groot aantal onderdelen op veurroad hemmen wol werd de olle smederij al rap te klein.

Hij kocht de noastgelegen dörpskroeg en ging doar wonen met zien vriendin. Achter werd n volwoardege winkel ienricht, met n koffiehoek en veul Harley-literatuur. De klanten reden mor wat groag noar Pieterziel veur aparte dingen, die ze aargenswoar aans niet vienden konden. Was et niet op veurroad, dan wis Bert voak wel woar hij et bestellen kon en as de nood aan e man kwam, dan lastte hij zelf wat ien mekoar. Nee, was er niet te koop ien e HD-Smederij.

Joarleks produceerde één van e metwaarkers van e HD-Smederij n vuustdikke onderdelen-catalogus veur de klanten. Dat was makkelek want zo kon je thuus n onderdeeltje opzuken, deurbellen aan Pieterziel en drekt heuren of et op veurroad was. Bert Kromme was zien tied ver veuruut, want hij deed, lang veur alle winkels der met begonnen, al aan t versturen van onderdelen noar zien klanten. Aan t enne van elke middag ston van Gend&Loos veur de deur om pakketjes op te hoalen, die deur thuuswaarkers van Bert netjes ienpakt en verzendkloar moakt wadden. Omgekeerd brocht de pakketdienst natuurlek ok veurroad vanuut de hiele wereld. Originele onderdelen uut e fabriek ien e USA en imitatie uut et verre Oosten. Mor krekt wat er bij de beurs van e klant pastte.

Echte liefhebbers, die een nije Harley kopen wollen wadden bij de HD-Smederij op t juuste adres. As je et basismodel kozen hadden, kon je de motorfiets met accessoires, spatborden, tanks, uutloaten uutbreiden noar eigen wens. Rond Pieterziel wadden er n poar monteurs/liefhebbers, die de motor dan ien mekoar zettende. Ik ben wel es op bezoek west ien Burum bij één van e vrijgezelle metwaarkers, die dat gewoon ien zien veurkoamer dee. Elk zien hobby, de één het modelvliegtuugjes en de ander knutselt n motorfiets ien mekoar.

De trouwdag van Bert en Gea was n biezundere gebeurtenis ien Pieterziel. Ooit had Bert es tegen zien moaten roepen: ‘Trouwen hoeft om mij niet zo zeer, maar als er 100 Harleys komen, dan gaan we samen naar het gemeentehuis’. Uuteindelek wadden et er dik zesteg machines die met reden noar t gemeentehuus van Gruupskerk. Et bruudspoar was ien n zijspoan zet en n bonte stoet motoren knappende deur t Grunnegerlaand.

Hoe et precies kwam dat de HD-Smederij vertrok is niet hielemoal helder. Was et toch ruumtegebrek of de wens om dichter op e Stad te zitten, mor ien 1996 vertrok et bedrief noar Bedum en veranderde de noam ien Motorcycle Storehouse. Loater is et bedrief verploatst noar Stad. Ien Pieterziel keerde de rust weer, persoonlek heb ik wel wenst noar de reuring die dat biezundere bedrief aan Pieterziel gaf.

Geert Zijlstra

Mientje: ‘Toe jong, moest methangen ien e bocht!‘

UIT DE KRANT