Van de ‘loodjesliest’: ‘t Pieterpad
Wat nog op mien “bucketliest” stijt is; et Pieterpad lopen. Eerst even over t Engelse woord “bucketlist”, ien t Nederlands ok wel loodjeslijst, dus loodjesliest veur hier!
t Woord komt van “kick the bucket” wat zoveul betekent as ‘de piep uut goan’, of ‘t loodje leggen’. Niet dat ik van plan ben om er tussenuut te kniepen! k Ben nog lang niet uutwandeld.
t Pieterpad lopt van Pieterburen noar de Sint Pietersberg bij Maastricht en is ien totoal zo’n 490 kilometer lang. t Pad i-der al derteg joar en al heul wat minsen hemmen et lopen. Der binnen boekjes met routes te koop en ze hemmen zulfs n webstee. De routes worden deur t heule laand aangeven met wit/rode streepkes. Mor wieten jim wel dat er ok n klein stukje Pieterpad deur ons Westerkwartier lopt?
Ik nem jim even met op dit stukje: We lopen aan e andere kaant van t Reitdiep vlak noa Garnwerd richting Hekkum. Bij de Wetsingersluus steken we t Reitdiep over om ien t Westerkwartier te kommen. Dan kom je ien e polder “Ons Behoud” met grode hoeves en steeën. Wetsingersluus is n prachteg plak om even op et steigertje te zitten en alles goed ien je op te nemmen. Van t zummer heb ik doar n schofke zeten en alles es rusteg bekeken. Al die fietsers die over de sluus -hier nuum we dat ok wel n ziel- kommen. De bootjes die deur de sluus goan en dan de minsen die even aan t wotter zitten goan of er ien duken vanof de sluusmuur. t Is ok n plakje met geschiedenis.
t Reitdiep, vroeger de Hunze, was n getijdenrivier en n belangrieke scheepvoartroute noar Stad. Mor ja, deur eb en vloed hadden ze ien Stad sums ok last van hoog wotter en stonden de kelders en souterrains blank. Dat was één van de redenen dat er ien 1873 begonnen werd met bouwen van een zeesluus bij Zoltkamp en n dam en n schutsluus bij Wetsinge. Van 1877 tot aan 1931 het de sluus dienst doan as schutsluus. Doarnoa werd et n keersluus, te bruken ien noodsituoaties. Over de sluus lag n iezern draaibrug met aan weerskanten twee kolommen met et joartal 1875. Deur de joaren hin i-der bij de sluus heul wat verbouwd en weer ofbroken. Ien 1994 stond er zulfs op e nominoatie om ofbroken te worden, mor gelukkeg is dat niet deurgoan. De olle kolommen binnen bewoard bleven en stoan nou weer midden op t brugje, t is allinneg n deurgang veur fietsers en wandeloars. Prachteg mooi, wel jammer dat die nije elektriciteitspoalen ien t landschap t beeld minder mooi moaken. (Zie foto)
Dan lopen we verder over t fietspad en kommen uut op e Oostumerweg, links of noar Oostum. Doar vienden we n old kerkje op n wierde. t Kerkje is hoogstwoarschienlek bouwd ien e 13e eeuw. Biezunder binnen de dakpannen, de zogenoamde monniken en nonnen, halfronde pannen, die ofwisselend met de holle en bolle kant noar boven leggen. Wel dan non of monnik is, wiet ik niet, mor vremd dat ze noast mekoar leggen magen. Aan e zuudkant binnen nog twee restanten van kruusmotieven te zien. De kruusen binnen aanbrocht deur zwarde pannen tussen de rode te leggen. Bij dakreperoaties hemmen ze jammergenog niet goed oplet en leit et nou wat vremd. Vroeger zatten ien dizze kerk de mannen aan e zuudkaant en de vrouwen aan e noordkant. Ok werden der kerdiensten holden ien t Westerkwartiers. t Meeste van de wierde is ofgroaven en de grond ofvoerd.
Wel i-der, op grode diepte, toch nog iets heul biezunders vonden; n kop van n reusachteg beest met de hoorns der nog op. Mysterieus doar ien Oostum.
We lopen Oostum uut en kommen op t fietspad met de noam Doodelaan. Over dit pad werden vroeger de doden noar t kerkhof ien Oostum brocht. De Doodelaan gijt over ien Schollelaan.
Veurdat we t Westerkwartier weer uutgoan, moe-we nog over de Wierumerschouwsterbrug.
t Gehucht Wierumerschouw is verdeeld over beide kanten van t Reitdiep de meeste huzen stoan ien t Westerkwartier, t andere gedeelte ien Het Hoogeland.
Ien dit kleine gehuchtje hemmen ze drie verschillende postcodes. Doar is niks mysterieus aan, komt gewoon deurdat et vroeger ien drie verschillende gemeentes lag.
Wierumerschouw wordt uutsproken as Wierumerschol. Een schol is n voetveer, die lag hier eerst, om over t Reitdiep te kommen en vandoar ok de Scholleweg. Ien 1887 i-der n draaibrug kommen met de noam Wierumerschouwsterbrug. Ok n mooi plakje met n bankje aan t wotter.
Dit was het kleine stukje Pieterpad dat deur t Westerkwartier lopt.
Leneke Struiksma
Mientje: ‘Ziel is sluus en Bom stijt veur n leeg stuk laand ‘
