Ik Proat Plat: Wotterbèrre
Joarenlang heb ik ien e woningienrichting warkt, ik begunde op mien achttiende bie n woningienrichter en beddenzoak ien e Ebbingestroat ien Stad. Noa de middelboare schoel, woardat ik mislukte en t doarom niet òfmoakt heb, ging ik eerst n schofke op e boerderij bie mien pabbe aan t wark. Mor elk was t er over eens dat doar gien toekomst ien zat en doarom zocht ik wat aans. Ik was niet veul wend as boerenpummel, mor t wark op zich beviel mij wel. En zo ston ik as snötneus parmanteg ien n grote winkel ledikanten en matrassen te verkopen. Ik kon alle vroagen van klanten beantwoorden, zunder miezulf òf te vroagen of de antwoorden wel juust wadden. Je mosten verkopen, doar ging t om..
Ien die joaren verkochten we nog bedden van één meter twinteg breed. Dat was n normoal tweepersoons berre. Al gauw kwammen der bedden van één vitteg breed. Dat was veur n stel net even wat comfortabeler. En de matrassen ien die tied wadden nog voak kepokmatrassen. Dat wadden van die vierkante stukken. Een matras beston uut drie delen, aans wadden ze niet te huften, zo zwoar. Al gauwachteg kwammen der polyether matrassen. Dat was n geweldege veuruutgang, ze wadden niet zwoar, wel lekker warm om op te leggen en ok hygiënischer. Zo heb ik langzoamerhand die ontwikkeling ien e sloapwereld metmoakt. Op e duur verkochten we niet allinneg ledikanten, mor werd et n “slaapkamerameublement”. Der zat n febriek ien Vroomshoop die op dat gebied vanalles ontwikkelde en ok Avek uut Surhuusterveen presenteerde zich ien die sector.
En zoas altied gijt zo’n ontwikkeling mor deur. De bedden werden aal breder en ok langer. As je n bietje metdoen wollen, dan most zo’n berre ien e breedte toch zeker uut twee delen bestoan. Twee matrassen noast mekoar, met de gleuf ien t midden. Doar wadden dan ok wel weer oplössings veur te bedenken, want et kon der lekker deur tochten. En weer werd er wat nijs bedocht. De binnenvering! Want uuteindelek bleken die polyether matrassen toch te hard. En met de binnenvering kon je zones aanbrengen, zodat scholder en heup ontlast werden. Doarnoa kwammen der boxsprings, dan ha-je twee keer vering. Ok ontdekte men et troagschuum. Dat kwam uut de ruumtevoart en doar wadden minsen ok weer gevuleg veur. Woar et schuum warm werd van t liggoam, doar werd et zacht en natuurlek zweren ok n barg minsen doar weer bij.
Der was nog n ontwikkeling, t wotterberre. En loat ik doar nou gien ervoaring met hemmen. Ja, ik heb er wel es op legen, mor ik heb ze nooit verkocht. Ien e joaren dat ze op e maart kwammen, was ik al met andere dingen bezeg. En der was drekt weer n hiele grote groep minsen die der bie zweerden. Dàt was t !! Doar is t begrip wotter-berre-effect van over bleven. Doar woar t wotter op één plak aan volume verlust, komt t op n aander plak weer boven. Ik heb er dus gien ervoaring met, mor ik ken t verhoal van Mark en Hanna. Zij wadden jong, hadden n flatje ien e Stad huurd en kochten een wotterberre. Jong en wild as ze wadden had et wotterberre wel wat te lieden en zo kon t gebeuren dat Mark op n oavend een aanloop nam en met n grote zweefduuk op t berre plofte. Hanna schoot zowat n meter de lucht ien en t wotter ok. Op e ziedkaant scheurde t geval uut en 700 liter wotter spoot met n grote boog tegen de muur omhoog, liep onder de deur deur en stroomde deur t hiele huus. De onderburen duvels, de plietsie werd er bij hoald. t Het n hiele consternoatie west met verzekeringen en zo. Op verjoardoagen wordt et verhoal nog voak verteld en dan wordt er nog smoakelek om lacht.
Piet de Vries
Mientje: “t Lek is weer boven wotter”
