Ik Proat Plat: Blauw wotter
Wotter is meestieds blauw. As je wotter ien n glas hemmen, kin je niet zien dat et blauw is,
mor as je uutkieken over zee is t wotter toch echt blauw en dan ok nog ien heul veul verschillende tinten. As je de Noordzee bekieken is t wat griesblauwgroen en as t störmt zitten der witte schuumkoppen op.
Ien Drenthe, ten zuden van Hoogersmilde, is n zandòfgroaving met de noam Het Blauwe Meer, et is n recreatieplas ien t natuurgebied Leggelveld.
Toen wij n keer ien Dwingeloo te kamperen wadden, binnen we om dit meer hin kuiert en ienderdoad et wotter was heul blauw, onze hond het er nog ien zwommen. t Meer is omringd deur bomen en n mooi wandelpadje, t is ontstoan deur zand en zuug werkzoamheden. Vlakbij zagen we n kalkzandsteenfabriek en nog n grodere plas woar ze aan t òfgroaven wadden. De eigenoar het kozen veur dit plak omdat Hoogersmilde makkelek per schip te berieken was.
We goan even wat verder vot. We waden een keer op t Grieks eiland, Zakynthos,
dit eiland is bekend omdat er n scheepswrak leit. Navagio strand hiet et, mor t is beter bekend as Shipwreck Beach. We hemmen die baai eerst van boven bekeken, heul hoog vanof n klif. Hier hemmen ze n soortement balkon bouwd, vanwoar je n machteg mooi uutzicht hemmen. Ik zag op foto’s dat er nou wel n solide hek om hin zit, joaren leden was dat niet zo en hadden we zo noar beneden vallen kind. Loater die vekaanzie hemmen we n boottochtje moakt noar dit strand. Tjonge wat leken die kliffen hoog, en t strand was zo wit en de zee zo blauw. We konden der niet noar kieken zunder dat de troanen ons over de wangen liepen, zo werden we verblind deur et blauwe wotter. Ik vroeg me òf hoe et kin dat et wotter je zo verblinden kin.
Et schient dat dizze ultra lichtblauwe kleur komt deur de zwavelholdende grotten rond et strand, de zogenoamde Blauwe Grotten.
Woar we ok blauw wotter zien is op Curaçao.
Toen ik viefteg werd, kreeg ik van mien nicht een heul mooi cadeau: een sloapkoamer ien heur huus op Curaçao. Nou, zo’n machteg cadeau loat je niet lopen.
Noa elf uur vliegen kwammen we, mien zus en ik, aan op t vliegveld Hato en werden “Bon Bini” heten deur mien nicht en heur gezin.
Met n temperatuur van zo’n 27 groaden was t doar goed toeven. Ok t zeewotter het altied n gemiddelde temperatuur van ongeveer 26 groaden en dan hemmen we t over de Caribische Zee. Alles zag er wat dor en dreug uut op Curaçao, dat komt omdat et mor n poar doagen per joar regent en dan lopt et wotter ok nog geliek de zee ien want et wordt niet opnommen deur de grond. Met onze nicht as gids hemmen we heul wat van t eiland zien. We mochten heur auto lenen en zodoende hemmen we ok nog prachteg mooie stranden bezöcht met et aller blauwste wotter dat er bestijt. Zoas de Grote Knip, Daaibooi, Mambo Beach, echt oadembenemend helderblauw wotter. Ze noemen et ok wel de Caribische turquoise tint.
Ok n heule belevenis was de kayaktocht vanof Playa Santa Cruz noar de Blauwe Kamer.
Moe-je veurstellen; ien een kayak over de Caribische Zee peddeln, wel moakt dat nou met.
We gingen noar de grot Boka Fluit. Dat is n grot met n smalle opening woar we onder deur zwemmen konden. As je ien e grot binnen en je kieken noar buten dan is alles echt heul mooi blauw. Dat komt omdat er op Curaçao gien algen en slib ien t wotter zitten. Et binnen voak witte zandbodems en et zunlicht wordt deur dizze witte zeebodems extra weerkoatst wat weer bijdroagt aan de schitterende turquoise en blauwe tinten. Ok de koraalriffen helpen om t wotter zuver te holden.
t Zal nog wel even duren veurdat ik weer ien zuks blauw wotter zwemmen kin, moet et veurlopeg doen met Spa blauw.
Leneke Struiksma
Mientje: “Dat helpt as zolt wotter veur de dörst!“
