Ik Proat Plat: ‘dat parkeren voak n probleem is, is jim alpmoal wel bekend’
Dat parkeren voak n probleem is, is jim alpmoal wel bekend denk ik. Niet dat t bie ons op t platteland zo’n toer is, dat niet, mor veuraal ien e grote steden en dus ok ien Stad Grunnen is t niet makkelek. Mien dochter woont ien stad, ien Selwerd, en ien e portiek van heur flat wonen acht huusholdens. Veur heur flat bennen an e stroat vief parkeerploatsen, dus jim kinnen wel noagoan, weineg kansen as je n keer op bezuuk kommen. Bie n zus van mie ien Drachten is t zo dat doar bie heur flat ien t centrum plak genog is veur auto’s, mor doar is dan n parkeerverbod veur niet vergunningholders. Dat doen ze omdat er aans parkeerd wordt deur minsen die an e aandere kaant van e stroat winkeln goan. Dus moet ik, as ik op veziede goa bie heur, mie aanmelden en dan word ik registreerd.
Nou las ik vandoag ien t Dagblad van t Noorden dat er nogal wat problemen bennen bie de bedrieven an t Hoendiep ien stad. Die zoaken hemmen doar genog parkeerplakken, allinneg worden die deur de week ien beslag nommen deur volk dat ien e binnenstad warkt, die luu zetten de auto doar del en goan dan verder op e fiets noar t wark. En dat worden der aal meer. Met as gevolg dat e klanten veur de meubelzoaken en zo, doar niet meer terecht kinnen en vertrekken noar elders. En doar worden onze ondernemers niet bliede van. Terecht.
Hoe zit dat dan ien mekoar doar. Nou, kiek, die parkeerplakken binnen eigendom van de pandbezitters. Dus, particuliere grond. De gemeente kin doar dus niet betoald parkeren ienvoeren, hemmen doar niks te zeggen. En veur de winkeleigenoaren is t ienvoeren van betoald parkeren noatuurlek ok desastreus. Dus die goan dat niet doen. En doarom goan ze binnenkört vergoadern en overleggen wat of ze der aan doen moeten. Ik zol ze best wat advies geven kinnen, mor doar zellen ze wel niet op zitten te wachten. Ik zol zeggen, kiek mor even noar t Sontplein, doar hemmen ze t regeld.
Wat mij nou opviel ien dat krantenartikel was de subzin: “Ik zet toch ook niet mijn auto op de oprit van de buurman?” Dat brocht mij geliek bie n veurval uut vervlogen tieden, toen ik nog ien t centrum van Tolbert woonde. Midden ien t centrum, pal noast e Postwoagen. Heden tendoage is t bie de Postwoagen alpmoal dik ien orde. n Riejoale ienrit, volop prachteg aanleide asfalteerde parkeerploatsen, ok bie de achtergelegen manege. Söms kommen der duzenden bezukers ien t weekend, mor der is altied plak. Ze hemmen t er dik veur mekoar
Dat was ien mien tied even aans. Ok toen was t er voak smorende drok, t is al joaren laang n centrum van vertier en vermoak, t ene feest noa de aandere bruloft viendt er ploats. Nou was t zo, toen ik er woonde, dat mien oprit zat an e ienrit noar de manege, recht tegenover de iengang noar de grote zoal van e Postwoagen. Doar zat ok de veurdeur van mien huus. En op n dag, t was hartstikke drok ien e Postwoagen, der was n groot feest, kwam ik ’s oavends thuus en toen ston der n auto op mien oprit. Makkelek parkeren. Ik zette mien auto der achter en ging noar binnen. Ik docht, ze bellen vanzulf aan. En ja, s nachts om half twee ging e bel. Eerst mor even rammeln loaten. Ketierke loater weer. Nog mor even wachten.
Noa vier keer bellen docht ik, loat ik nou mor es even kieken goan. Ien mien badjas noar de deur en ja, doar ston n man wat te schuttern. “Wat i-der meneer?” “Ja, ik wol der wel groag uut”, ston er te studdern. Och, zee ik, joen auto stijt doar veileg ja en zo hemmen we n stedje stoan te proaten. Noatuurlek heb ik die man ien t lest goan loaten, ik wol zien feestje ja ok niet bedarven.
k Was t verhoal host vergeten tot ik vandoag dat krantenartikel las over stad. k Wol t jim ok even vertellen.
Piet de Vries
Mientje: “Parkeren is n vak”
