Ik Proat Plat: Noorwegen
Elk joar as de vekaanziebestemming weer aan e orde komt, dan heuren ze mij steevast Noorwegen numen. Ok al bin ik n fervent Itoaliëganger, Noorwegen het op mij n woeste aantrekkingskracht. k Bin er al n aantal keren west, veur t eerst ien 2004, toen he-we n rit noar de Noordkaap moakt. Fantastisch! Mien vrouw had er niet zoveul zin aan en ik wiet nog toen we op e hinweg deur Lapland reden, dat ze tegen mie zee, toen e snijvlokken tegen de veurruut van e camper vlogen: “Dus dit vienstoe de ideoale vekaanzie? Van mij huuft et niet!”
Nou is dat allemoal goedkommen. We binnen langzoam vanòf de Noordkaap via de fjordenkust weer ommeneden goan. Op eneg moment kwammen we aan bie n fjord ten Noorden van Narvik, doar he-we midden ien e natuur stoan, de fjord aan e voeten. t Was vrijdagmiddag en we binnen bleven tot de woensdag derop. t Was 25 groaden boven nul en.....we hemmen al die tied gien mins zien!! Toen mos we vot omdat ik gien stroom en gien wotter meer had. Vanòf die tied wadden we verkocht, wat i-der mooier dan dat! Een joar of wat loater bin-we weer die kaant op west, he- we de hiele zuudkust verkend. Wat weer n belevenis, al die wottervallen, die woeste fjorden, schitterend.
t Mooie van Noorwegen en ok Zweden is dat je der vrij kamperen kinnen. As je n mooi plakje vienden ien e natuur, dan kin je doar gewoon stoan goan. Met n camper is dat ideoal vanzuulf, je hemmen je huus bie je. Je moeten trouwens wel over stoalen zenen beschikken as je de Trollstigen rieden en zeker gien hoogtevrees hemmen zoas ik. Elf hoarspeldbochten en langs gruweleke òfgronden. Mor mooi!! En dan de Preikestolen (preekstoel). Een uutstekende röts die 604 meter loodrecht boven de Lysefjord uutstekt. Je moeten een mooi enne klimmen om der te kommen, mor dan krieg je ok wat. Schitterend! (Foto: Preikestolen_Norway)
Dus dizze zummer weer noar Noorwegen. De weerberichten wadden goed, dat wil zeggen, aan e kust was t wat minder, doar was t redelek kold, mor ien t binnenland en langs de Zweedse grens was t prachteg weer. t Landschap is doar wel aans en de wereld is wat bewoonder. Wat ons drekt opviel was dat de Noren zulf nogal precies binnen. As er op e weg aangeven wordt dat je mor viefteg rieden magen, ok al is de weg breed en stil, dan holdt elk zich doar aan. Op n camping moet je precies bepoalde òfstand van mekoar holden, want dat binnen de veurschriften van e overheid.
t Leverde nog n leuke anekdote op. Smiddags toen we even wat boodschappen deden zag ik n Pizzeria woar je ok òfhoalen konden. t Leek mij n goed plan veur oavends. Dus ik op e fiets vanòf de camping noar t winkelcentrum om twee pizza’s te hoalen. Ik stond veur de teunbank en dee mien bestelling. De vrouw achter de teunbank keek op heur horloge en zee: “No sir, we close now”. Ik kon hoogspringen en leegspringen, mor t was precies zeuven uur en ze ging dicht. Toen heb ik mor twee diepvries pizza’s ophoald bie de supermaart en die opwarmd ien t keukenkje op e camping.
Hoe t ok zij, ik kin jim van harte aanbevelen om es noar Noorwegen te goan. As je van rust en natuur holden, t is nargens mooier. En over t weer hei-je niks te kloagen. Zummers krekt zoas hier.
Piet de Vries
Mientje (Noors): "Det selger som hakka møkk"
Betekenis: Het verkoopt als gehakte stront (Het verkoopt heel goed!)
