Op noar 2025
En zo bin je zo mor weer 53 columns ‘Ik Proat Plat’ verder. t Leek host guster dat Piet de Vries zien betoog schreef over de woningbouw bij Tolbert. Der most meer bouwd worden! Piet schreef et en elk riep t hum noa, van Willem-Alexander tot Rutte van Schoof tot Mona Keizer! Dat et ien werkelekheid wat minder vlot lopt is wel dudelek. Hemmen we gien stikstofprobleem, dan kruupt er wel n biezunder muuske over de grond of i- der n hiele buurt die protest aantekent. Zo komt er gien schop ien e grond. Niks nijs, schreef Alie de Vries wat loater, want ok noa de oorlog mosten minsen heur behelpen en had meneg gezin n kostganger ien huus. Nee dan ien e middeleeuwen! We bouwende börgen, herbergen en boerderijen, met dank aan die tuuke monniken, die ons leerd hemmen hoe we bakstienen moaken moeten.
De hoofdmoot was ok dit joar weer de geschiedenis van t Westerkwartier. Niet allinneg vanuut de middeleeuwen, zoas de verhoalen over de Grovestins of de börg bij Doezum, mor ok veul verhoalen over lutje fabriekjes, die de veurege eeuw kleur gaven aan e dörpen. Henk Wierenga schreef over HaDeWe uut Korhörn en Geert Zijlstra brocht de Cartonagefabriek ien Lutjegast en de boerenwoagens van Strikwerda uut Moarum weer tot leven. Dankzij Leneke Struiksma moeken we met regelmoat n flinke wandeling binnen en buten de provinciegrens. Zo kwammen we over t Pieterpad, langs de Scheiding en ze liet ons veurege week zelfs Bethlehem zien. Ok de biezundere doagen kwammen aan bod. Van Sint Martinus tot Sunterkloas, van e hondsdoagen tot aan t koekhakken ien t café.
De miest biezundere verhoalen binnen de verhoalen over gewone minsen. Eelke Solle schreef n verhoal over de bekende bakker De Boer van Lutjegast en Alie brocht Nuusmer Ate Doornbosch weer es noar veuren. Hiel biezunder hoe die man, ver veur ons op, al bezeg was met de streekhistorie ien e vörm van liedjes en verhoalen. Een traditie die we ien ere holden moeten.
Met Eelke en Alie hemmen we drekt ok onze nije schrievers van2024 te pakken, mor we kinnen meer schrievers bruken. Om onze toak ien 2025 wat te verlichten roepen we jim ien hoofdletters op:
“IK PROAT PLAT, SCHRIEF MET ONS MET!”
Wij bieden jim plezier! Plezier ien t schrieven en vertellen van mooie verhoalen aan e lezer. t Zol toch prachteg weden, as we aan t enne van 2025 een liest met, pak hum beet, 20 schrievers hemmen. ‘Veule handen moaken licht waark’.
De spelregels binnen simpel en zeker niet streng:
- Et stukje is körter dan 650 woorden.
- Et onderwaarp: Een gebeurtenis ien t Westerkwartier, van vroeger of hedentendoage.
- Een fantasieverhoal, schreven ien t Westerketiers of Nederlands (wij toalen et om)
- Gien schelderij, vloeken, tieren of nep nijs.
- Lever as t kin ok n foto aan, woar gien publicatierechten op rusten.
Ok onze trouwe lezers kinnen methelpen, kiek es n keer ien e rommel-loatjes of der meschien nog n mooi verhoaltje ien lijt. Denk niet, dat is niks. … mor stuur t altied noar ons toe. Wij bekieken et en moaken der desnoods een mooi verhoal van.
Elk verhoal gijt deur de spellingscorrectie van Alie de Vries en we binnen benijd of we t eerste AI-verhoal, deur jim bedocht mor deur de computer schreven, ontvangen kinnen.
De mailbox info@komopverhoal.nl is paraat en jim kriegen altied een reactie.
De deur bij t ‘Ik Proat Plat’ team stijt wiedwoagen open en wij schrieven vanzelf rusteg deur, want er is nog genog te ontdekken en te beschrieven ien t Westerkwartier.
Alle lezers bedankt veur jim belangstelling en hopelek tot ien 2025!
Eelke Solle, Leneke Struiksma, Alie de Vries, Piet de Vries, Henk Wierenga en Geert Zijlstra
Mientje: ‘Hij lugt asof t gedrukt stijt!’
