IPP: Viefteg joar leden
Nog niet zo lang leden is burgemeester v.d. Tuuk begonnen aan zien tweede termijn ien e gemeente Westerkwartier. Hij was ok de leste (waarnemend) burgemeester van e gemeente Grodegast. Ien december 1975, dus al weer 50 joar leden, dee dhr. J. Verbree zien entree ien Grodegast. Dat werd vierd met veul spektoakel. Uuteindelek zol Verbree, ien e traditie van langzittende burgemeesters, vieftien joar de gemeente dienen.
De aankomst van e nije eerste burger viel zowat soamen met de ientocht van Sunterkloas en meschien was de ophef nog wel groter dan die bij de Goedheiligman. Et gezin Verbree werd bij de gemeentegrins opwacht deur vertegenwoordigers van de zeuven dörpen van e gemeente. Doar klom de femilie ien n open koets, die met twee hoornbloazers en ruters, de tocht noar Grodegast moakte. Langs de stroat stonden schoelkiender en overal hingen de vlaggen uut. Et was flink kold, dus men was bliede toen ze om drie uur bij café Langerwaard achter de kachel schuven konden veur de officiële ienhuldiging, deur loco Hoeksema, die Verbree de ambtketen omhing. Alle partijen kwammen aan t woord om de nije leidsman welkom te hieten. Ok kreeg er, ien lijn met die andere biezundere gast, een zakje sukkeloageld. Diezelfde oavond kon de bevolking kennes moaken en ze werden doarbij vermoakt deur de korpsen van Crescendo-Opende, Beatrix-Doezum en Woudklank-Grootegast.
Verbree viel met e neus ien e butter want een poar moand loater ston prins Claus op e stoep om de vestiging van LEGO te openen. Wederom groot feest met n wedstried veur de kiender, wie et mooiste bouwwaark moaken kon. De dochter van Verbree dee ok met en et sierde de burgemeester dat er eileks niet wol dat ze één van e prieswinnoars worden zol. Hij wol et idee van ‘deurgestoken koart’ gien kans geven. De prieswinnoars kregen een reiske noar Denemarken aanboden. Ik bin benijd of er nog één van hen verslag doen wil! Hoe was de reis noar Legoland?
Eind joaren 70 en begun 80 gebeurde der best veul ien e gemeente. Ien 1979 opende hij, soamen met ambassadeur Fairbairn van Australië, sporthal de Leegens, woarbij hij benoadrukte dat et binnen 9 moanden bouwd was en vanuut de eigen middeln van e gemeente betoald was. Vanòf et eerste moment werd de zoal drok bezöcht, dus et voldee wel aan een behoefte. Hij was n man met ambitie, die Grodegast een flink drukker ien e rug geven wol. Meer noadruk op e middenstand en hij was tröts toen er ien 1978 een nije vestiging van e bank kwam en ien 1979 een sportcomplex ien Opende.
Biezundere aandacht was er ok veur et zandgat noabij de Scheiding. Verbree von dat de gemeente soamen met de ‘natuurclubs’ een plan moaken most. Doar werd uuteindelek vakantiepark ‘Strandheem’ met 8 hectare recreatieterrein realiseerd. Toen et kloar was sprak hij wel de vrees uut dat er grote drommen volk noar et Westerkwartier kommen zollen. Et is wel n bietje metvallen met de bussen vol Japanners!
Verbree hiel ok van sport en spel. Met regelmoat was er betrokken bij et Pedaloteam, die op de reuzentandem reden en hij was de promotor achter de deelnoame van de gemeente aan et Stedenspel ien 1981/1982. De ‘sporters’ van Grodegast deden et geweldeg, mor de ‘denkers’ werd òftroefd deur de bewoners van Nuth. Verbree toonde zich n goed verliezer en feliciteerde zien Limburgse collega Chris Rutten.
Ien 1989 werd bekend dat Verbree en nije benoeming ien Cappele aan de IJssel aannommen had. Dik vieftien joar Grodegast was niet ongemerkt verlopen. Dirk Haitsma nam et ambtketen tiedelek over, mor werd ien 1990 opvolgd deur Kor Dijkstra, die mor liefst 26 joar ien dienst bleef.
Geert Zijlstra
Mientje: “De eerste stien moet op vaste grond leggen!
