IPP: Hoog bezoek
We hemmen de verkiezingstied net weer achter de rug en werden weer bedolven onder sjaaltjes, pennen, stickers en wervende filmpkes op TV. Alles om ien e gunst van de kiezer te kommen. Wat et opleverd het! Dat loat ik aan jim, mor der viel me wel wat op.
De lu op e kiesliest wadden overal, van ‘Jeugdjournaa’l tot ‘Vandaag Inside’, ze rugelden over mekoar henne, met beloftes, kritiek op e andern en ‘kiek es hoe normoal ik ben’-toneelstukjes. t Ging er minder om hoe we soamen de problemen oplössen, mor meer over et butenspel zetten van andere partijen en sums ok hiele bevolkingsgroepen, die niet meer met doen. Zo kommen we der niet noar mien idee, mor we zillen wel zien of er veur de kerst een nij koppeltje ministers deur de keuning presenteerd wordt. Mor der is ok nog klein leed!
Ien Pieterziel wadden ze et grote verkiezingsbord, dat ien et uutzicht van n poar huzen ston, stinzat. t Werd dizze keer 300 meter veur t dörp ien e baarm zet. Et ston ok nog es schots-en-schief en me dunkt, dat n boel minsen et niet eens zien hemmen, dat et der ston. Et dörp was ok al 8 week onberiekboar west vanwege de aanleg van nije riolering. Huzen onberiekoar met e auto, mor ‘wat moet dat moet’, men von et wel n goed politiek besluut.
Ien e leste week mosten de wegwarkers hard aanpoten, want minister Hermans zol op warkbezoek kommen en die kon natuurlek niet op liesleerzen deur de modder. Net op tied wa-der n padje kloar en hiel Sophie dreuge voeten, mor werd wel nat van e regen. Ze kreeg ien Pieterziel van burgers en de gemeente de boodschap met, dat er meer en beter aandacht weden most veur t oplössen van problemen, die ontstoan deur de mijnbouw. Ze gaf zelf as boodschap dat ze deurgoan met gas pompen uut e veldjes rondom Griepskerk. Ze zol de vroagen en wensen van Pieterziel en omgeving wel ‘meenemen’ ien heur besluten. Een kritische opmerking uut e zoal: ‘Alpmoal wel mooi en oardeg, mor dizze minister is straks vot en wel komt er dan veur ien t plak?’ Kortom wat hemmen toezeggings veur zin, as de minister al met de jas aan noar de uutgang van t ministerie lopt. Ok weer n stukje verkiezingstoneel?
Mor et werd twee week loater nog n slag aarger. Overheden en burgers wollen een bezwoar iendienen, tegen de verlenging van gaswinning ien t veld Pieterzijl-Oost. De burgers hemmen et netjes doan, al betekende dat, dat ze ien vekanzietied achter de computer kropen en campings òfreizen mosten om handtekenings van dörpsbestuurders op tied op te hoalen. Met et zwit veur de kop, stopende ze de stukken net op tied bij de Raad van State ien e brievenbus. Zij wadden wel op tied. Niet veul loater werd bekend dat de ambtenoaren van verantwoordelek gedeputeerde Dekker te loat wadden met et ienlevern van de stukken en dus niet ‘ontvankelijk’ wadden. Ze stonden butenspel en der was gien VAR om dat besluut te corrigeren. Nog vervelender was, dat e provincie et bezwoar ok noamens de wotterschappen en de gemeenten doen zol. Die stonden natuurlek ok met de oren te klappern.
Dus weer hoog bezoek, want Dekker kwam snel noar Griepskerk om persoonlek uut te leggen hoe dat nou gebeuren kon en om duzendmoal excuses aan te bieden. Doar koop je nogal wat veur! Ze von ok dat ze niet overal zelf om denken kon! Dat mosten die onprofessionele burgers, dus wel zelf alpmoal doen. t Hoge bezoek kwam ien e doagen doarnoa ien n biezunder daglicht te stoan, toen de pers op zoek ging noar de werkeleke oorzoak. Was er n telefonische toezegging veur uustel doan? Wist de gedeputeerd al eerder dat ze veul te loat wadden? Binnen de processen bij de overheid wel slutend? Vroagen, vroagen en et schoamrood van e bestuurders nam toe! Gelukkig is et bezwoar van e burgers der nog, al gaf de Raad van State aan dat de behandeling nog wel n joar duren kin.
Ondertussen wordt er rusteg gas pompt uut de veldjes en wel wiet binnen ze met n joar wel leeg. Al dat hoge bezoek en de reboelie het dan toch zin had, uutstel van besluut en de politiek die zien zin kreeg. Pompen mor! t Vertrouwen van de burger ien e politiek kinnen ze straks mooi ien n leeg gasveld opsloan. Zunde, zien we nooit weerom!
Geert Zijlstra
Mientje: “Proatjes vullen gien goatjes!, goatjes geven wel gas!’
