Ik Proat Plat: Et lopt zoas et lopt
Joaren heb ik ien e organisoatie van de Abel Tasman Struuntocht zeten, de eerste 3 keer van dizze tocht heb ik met organiseerd. De tocht het ok altied een nauwe band had met de streektoal. Zo hemmen we n keer een wedstried uutschreven wel de mooiste spreuk verzinnen kon die verband had met et lopen op zich of de Struuntocht, 10 spreuken werden op borden langs de route ploatst. Loater binnen dizze borden ploatst langs wandelroutes rond Lutjegast en tot op e dag van vandoag stoan ze der nog.
Zo liep ik es n keer laangs et Honderd bij t van Starkenborghkenoal, doar stijt nog zo’n bord van e Struuntocht met de tekst Et lopt zoas et lopt. Die borden wadden bedoeld om onderwegens de gesprekken op gang te brengen, om mensen te prikkeln en aan t denken te zetten. Ik liep die keer allinneg en kon dus ien alle rust met mijzelf ien gesprek. Et lopt zoas et lopt, woar moak je je drok om? Je kinnen der niks aan doen, et lopt zoas et lopt, doar hei- je gien ienvloed op. Je kinnen je wel drok moaken om van alles en nog wat, mor wat moakt et uut. Is et n god die et bestuurt of word je stuurd deur et lot? Wel zal t zeggen, je wieten zo weineg zeker ien t leven, et meeste lopt zoas et lopt.
Een enne verderop stijt nog zo’n bord: Bij de Struuntocht en et leven, is één ding geliek. Hoe verder van t begun, hoe dichter bij t enne. Ik begon weer te prakkezeren, der was gien speld tussen te kriegen, et was n woarheid as n koe. Mor ik docht toch verder en ontdekte wel n verschil. As de Struuntocht 25 kilometer is, wiet je wanneer je op e helft binnen. Dat is bij et leven niet zo, wel kin nou zeggen: ik bin op e helft? Jammergenog zien we mor al te voak minsen, noar ons idee, te vroeg goan die hemmen nooit wieten wanneer ze op e helft wadden.
Ik wiet dat zelf ok niet. Ja, toen ik viefteg wer, toen zee ik uut e gek, ik bin op e helft. Mor heb ik geliek? Dan zal ik eerst 100 worden moeten om dat te kinnen bewiezen en ik heb gien idee of ik dat word. Mien veurgeslacht wer zo old niet, dikke kaans dat ik dat ok niet red. Dus de helft zal al wel achter mij leggen en hoeveul der nog veur mij leit, we zallen et zien. Eén ding is zeker, ik zal der van genieten, want et kin mor zo veurbij weden veur je der aarg ien hemmen.
En dan stijt er nog zo’n bord met de tekst Et ken vremd lopen ien dizze wereld. Zo’n spreuk zet je ok aan t denken, want dat we nou ien n vremde wereld leven is wel zeker. Sinds Trump aan e macht is, is er elke dag ien t nijs en volgens mij dut er et erom. Gien dag ien t nijs, is volgens hum een verloren dag. Tenminste, ik denk dat hij dat denkt. Je kinnen de kraant niet open sloagen, op t internet kieken, of de televisie aanzetten, krekt geliek wat, altied zie je dat male oranje proekje hoar veurbij kommen,
Op dit moment is ien t nijs dat de Arabieren hum een vliegtuug beloofd hemmen, een oardegheidje van 400 miljoen. Ik heb zelf bij de overheid warkt en doar mos ik altied een epistel ondertekenen dat ik gien geschenken van andern aannimmen zol. Je konden es omkocht worden, doarmet was je je onafhankelijkheid kwiet. Mor Trump viendt dat hij zo’n geschenk niet weigern mag, hij is van plan der met rond te vliegen tiedens zien presidentschap en noa òfloop wordt et toevoegt aan zien privé vloot. t Is wel hiel wat aans as n boske bloemen of n lekker geurtje veur je ienzet.
Eelke Solle
Mientje: ‘’ Gezondheid is et grootste kado wat je mor kriegen kinnen!
