Ik Proat Plat: Wonderlek
As lut jonkje zat Bart vol vroagen, hij kon nog mor net proaten of hij vroeg zien olders et hemd van t gat. Hij vroeg zoveul ze der wel es zat van werden, dan zeden ze, op de zoveulste vroag die begon met woarom. Gewoon, omdat et nou eenmoal zo is. Dan was er weer n tiedje stil.
Op schoel kon Bart goed met kommen, die nijsgieregheid het er zien heule leven bij hum holden. Ok op schoel (foto: Beeldbank Groningen: Eelke’s schoel ien Lutjegast) vroeg hij zien meesters en juffen et hemd van t gat, met gien enkel antwoord nam hij zomor genoegen. Hij las boeken, keek televisie, speurde op t internet en wist altied alles. Ien n mum van tied zat zien schoeltied der op en was et tied om te studeren. Hij wol filosofie studeren om achter de zin van t leven te kommen. Niks wa-der zomor, zo was zien overtuging, overal zat n reden achter en noar die reden ging hij op zoek. Ien 6 joar tied studeerde Bart òf, hij hoalde zien bachelor en master cum laude. Zien olders wadden slim tröts op heur geleerde zeun en nou hij zien eigen antwoorden vienden kon, huvven zij hum niet meer te antwoorden. Zij konden nou de vroagen stellen, want hij wist ienmiddels veul meer dan zij.
Bart kin uren noadenken over dingen woar andere minsen gien aandacht veur hemmen, zoas bijveurbeeld; woarom een ronde pizza altied ien n vierkante deus zit. Eerst vroeg er hum òf woarom pizza’s altied rond binnen en woarom alle deuzen vierkant. Je kinnen ronde pizza’s ok ien ronde deuzen doen of de pizza’s ien t vervolg vierkant moaken. Mor je doen et niet en dan is er gien antwoord te vienden. En woarom is n boksring altied vierkant, ok dat wiet gienéén. Hij kwam er niet uut.
t Zelfde met pannenkoeken, hij is er gek op, mor wanneer hij ze bakt, mislukt de eerste altied. Hoe voak hij ze ok bakt, altied is de eerste niet te eten. Mor woarom is dat zo? En hoe hij ok zoekt, hij krigt gien antwoord.
Hij kin ok eindeloos filosoferen over levensvroagen zoas ‘wat is de zin van t leven’ mor krieg je n antwoord wat er toe dut? Meestal kies je n antwoord dat et beste bij je paast, mor is dat de ultieme woarheid? En hoe zit et met computers, nimmen die straks alle menseleke gedachten over of slimmer nog, nimmen ze ons leven over? Bart kwam er niet uut en hij roek ien e versukkeling.
Bart is wend om vroagen te stellen en antwoorden te kriegen, mor der binnen ok vroagen woar nooit n bevredigend antwoord op komt. Hoe goa je doar met om? Veur Bart is dat n levensles. Omdat hij zoveul noadenkt concentreert hij hum op et beeld De denker van Rodin. Et beroemde beeld verbeeldt een man die ien diepe gedachten verzonken is. Et beeld stijt stil, der zit gien beweging ien. Bart het et beeld bezöcht, liep er aan alle kanten om hin en hoe der ok keek, der veranderde niks aan et beeld. Hij zigt alle details, t is mooi moakt, mor beweging zit er niet ien. Bart besluut om een klein beeldje van De denker te kopen en zet dat thuus ien e vensterbaank. As er weer es met zien gedachten ien e knup zit, kikt er noar t beeldje en dan komt et besef, je kinnen eeuweg argens over denken en verkloarings veur zoeken, mor hoe lang je ok denken, op summege vroagen is simpelweg gien antwoorden te vienden.
Eelke Solle
Mientje: ‘domme vroagen bestoan niet’
