Ik Proat Plat - Pepermuntwichtje
Een schoftje leden kregen we van Riemke Stavasius uut Garnwerd een tip om een ‘Ik Proat Plat’ over t Pepermuntwichtje te schrieven. t Pepermuntwichtje was n tante van Riemke en werd ien 1955 ien Harderwiek vermoord en die moord werd nooit oplöst. Een onderzoeksinstantie ‘Old Cold Cases Culemborg’ is nog steeds bezeg om de doader te vienden. Wat is er destieds gebeurd?
Dieuwerke van der Vlegel, heur koosnoam was Doetie, werd ien 1930 ien Griepkerk geboren, ien n tied woarien minsen ien t dörp wisten van e wederwoardegheden van elkenéén. Binnen de kerkeleke gemeente woar Dieuwerke en heur zuster opgroeiende, was dat zeker et geval. Dieuwerke was gek op mannen ien uniform. Ze waarkte ien Stad en as ze met e bus noar heur waark ging, ging ze zo zitten dat de chauffeur, ien uniform, heur ien e spiegel zien kon.
Ien Stad volgde ze wel es plietsiemannen, die bood ze dan een pepermuntje aan, zo kreeg ze binnen et plietsiekorps de bijnoam et ‘Pepermuntwichtje’.
De oldere zus van Dieuwerke vond heur gedrag mor niks, ze schoamde zich derveur en vond et gevoarlek.
Hoewel ze makkelek contact moakte met mannen, kreeg Dieuwerke nooit n vriendje. Meschien was de reden hierveur wel dat heur gezicht vol met pukkels zat. Dieuwerke wol groag n gezin met kiender hemmen mor dat lukte niet en doar had ze veul verdriet van.
Ze werd receptioniste, mor was eileks veul liever bij de plietsie goan, mor doar wadden heur olders op tegen. Ze solliciteerde bij t sanatorium ‘Sonnevanck’ ien Harderwiek en tot verrassing van t heule dörp werd ze aannommen en verhuusde. Harderwiek was n ploats met meerdere kazernes en veul militairen. Wol Dieuwerke doarom noar dit stee?
Op 15 feberwoarie 1955 begon ze ien Sonnevanck as portier/telefoniste. Begun april zee ze tegen een vriendin dat et heur doar toch niet zo voldee. t Kommende Poasweekend, zol ze noar Griepskerk goan om met heur olders te overleggen wat ze doen most. Mor zover is niet kommen.
Woensdagmiddag 6 april om half vier gijt Dieuwerke n stukje fietsen omdat t zuks mooi weer is en dan kin ze onderwegens geliek n stukje ziep veur n collega metnemmen. Om zes uur moet ze weer aan t wark, mor ze komt niet opdoagen en de directeur van ‘Sonnevanck’ dut woensdagoavend aangifte van vermissing. De volgende dag kommen heur ongeruste olders noar Harderwiek en wordt er n zoektocht op touw zet. Met vittig man zoeken ze t bos, de stad en de heule omgeving òf, mor Dieuwerke wordt niet vonden.
Vief doagen loater, op tweede Poasdag, viendt n groepke wandeloars heur, ze leit ien t bos op 800 meter van t sanatorium. Heur fiets stijt wat verderop, Dieuwerke leit veurover op e grond en ze had gien ziep bij heur. Om heur hals zit heur grieze wollen sjaal, die strak aantrokken is en volgens de patholoog -anatoom is dat de vermoedeleke doodsoorzoak. Hij treft verder gien sporen van mishandeling, aanranding of beroving aan. t Is vremd, dat ondanks de regen, heur kleren niet smirreg of nat binnen. Dat wiest er op dat heur liek loater ien t bos delleit is. Ok viendt de plietsie tien meter verderop twee koartjes, één van e tram ien Stad en één van e bus Grunnen-Hoogkerk.
Ien t onderzoek kommen der twee verdachten noar boven. Ten eerste n man woar Dieuwerke regelmoateg over sprak tegen familie en vriendinnen. Apart is dat gieneen die man ooit zien het en ok de plietsie kon de man niet vienden. De tweede verdachte is n militair die ze ien e joaren viefteg ontmoet had en loater ien Harderwiek weer. Eerst ontkent de militair dat hij Dieuwerke ien Harderwiek weer trof, mor loater roakt er verstrikt ien zien eigen verhoal en bliekt et dat hij en zien vraauw heur thuus uutneudegden. De militair blift vanwege gebrek aan bewies vrij rondlopen.
Dan is er nog een anonieme brief, woarien schreven wordt dat Dieuwerke een ontmoeting had met n man ien uniform. Ien n boswachterswoning wordt, bij et opschuren van n deur de volgende tekst vonden: ‘Geachte heer Ter B., beken de moord op Dieuwetje van de Vlegel en uw geweten zal rust hebben!’ Der wordt zelfs n beloning van duzend gulden uutloofd, mor de zoak blift onopgelöst. Joaren loater komt Peter R. de Vries met nog n getuge op e proppen, die beweerd dat er n belangriek persoon te moaken het met de moord op Dieuwerke. t Onderzoek noar aanleiding van dizze bewering levert niks op.
De St. Onderzoeksbureau Old Cases Culemborg is begonnen om de moord op Dieuwerke opnij te onderzoeken. t Heule verhoal en de vroagen van t onderzoekbureau kin je vienden op www.moordverhalen.nl onder ‘Moord op het Pepermuntmeisje’.
Een biezundere geschiedenis over zo mor n meiske uut Griepskerk, dat et ‘Pepermuntwichtje’ nuumd werd en lijdend veurwerp was van n biezunder mysterie.
Leneke Struiksma
Mientje: ‘Hij stak zichzelf n pepermuntje achter de koezen!’
