Ik Proat Plat - Halfweg
Ja natuurlek wieten wij ok wel dat Halfweg niet ien t Westerkwartier leit, mor vlak over de grens ien e gemeente Noardeast-Fryslân.
Halfweg leit rond de driesprong van e Leegsterweg en e Eeuwe Ennesweg, tussen Warfstermolen en t buurtschap De Leegte, op e weg van Pieterziel noar Kollumerpomp.
Mor we binnen ok halfweg 2023 en ien e eerste 7 moanden hemmen we wekeleks ien e rubriek ‘Ik Proat Plat’ schreven en doar reacties op ontvangen. Op summege stukjes kommen we doarom nog n keer terug.
Meschien is et jim opvallen dat er dit joar minder bijdroagen van Henk Wierenga ien e krant stoan hemmen. Dat klopt, Henk had et tot mei-moand smorende drok met de theaterveurstelling ‘De 16’ op Trimunt. Doarnoa gaf er aan dat er niet veul onderwaarpen meer had om over te schrieven. Hij blift wel paraat veur ‘Ik Proat Plat’, mor t zil minder voak worden en benoam over zoaken uut e geschiedenis goan.
Doarom doen wij n beroep op onze lezers, help ons om e rubriek ‘Ik Proat Plat’ te vullen. Dat kin hiel eenvoudeg deur tips aan ons te geven, een verhoal/onderwaarp aan te droagen of zelf te schrieven.
As je schrieven willen dan helpen wij doarbij. Alie de Vries zörgt veur de toalondersteuning. Ze geft tips over schriefstijl en aanwiezings over et gebruuk van t Westerkwartiers. Uut ervoaring wieten we dat et zeker stimuleert as je zo nou-en-dan bruukboare tips kriegen woar je met verder kinnen.
De deur stijt wiedwoagens veur jim open, wel duurt is welkom!
Et thema wat wij ien gedachte hadden veur 2023 was ‘Staarke verhoalen’
Et mog overal over goan (elk van ons had wel verhoalen op veurroad, die we de andere joaren niet kwiet konden). De eerste 10 stukjes gingen over van alles en nog wat.
Geert schreef over zien huus en architect van der Molen uut Visvliet die et ontworpen het. Noa et verschienen van et boek “Van der Molen en Gelderloos, Architecten van Naam” (ISBN 97890 79742370) deur Bertus Fennema old-burgemeester van Zuudhörn, kwammen er veul reacties van minsen, die et idee hemmen dat hun huus ok deur Van Der Molen tekend is.
Wat zol et mooi weden om een fietsroute te moaken langs de ‘Van der Molen’-huzen ien e regio. En doarmet te loaten zien, hoe veulziedeg en herkenboar t waark van dizze man is.
Ok al ha-we dit joar gien scheuvel-ies, Piet de Vries vertelde toch over zien old dörpsgenoot Henk Ottema, die et verrassend goed dee ien e zwoare elfstedentocht van 1963. Jammer genog sloop et zettersduveltje et stukje binnen en was de verwiezing noar et eigen verhoal van Ottema niet correct. Hierbij de link woar je alles nog es noalezen kinnen: https://www.fredewalda.nl/verhalen/83-oud-winter-nieuws-uit-1963-henk-ottema-vertelt.
t Is verboazend hoeveul verhoalen der nog altied opduken over de Tweede Wereldoorlog. Voak zeer persoonlek en dicht bij huus. Wij stellen et op pries as onze lezers die verhoalen met ons delen willen, want ze worden met veul interesse lezen. Iensturen kin noar info@komopverhoal.nl.
Ien juni en juli moeken Piet de Vries en Geert Zijlstra een trip-down-memory-lane, deur te schrieven over de buurt woar Piet opgruuid is. We kregen een reactie van Dirk Ferwerda, die ons erop wees dat niet de Hunze, mor de Kliefsloot ien t oosten de grens met et Humsterlaand vörmde. Dirk gaf ons meer hints, onderwaarpen veur nije verhoalen.
Toch nog even terug noar Halfweg, n lut buurtschapke van n koppeltje huzen en boerderijen. Vroeger was er n schoel, die bestemd was veur kiender uut Boerum, Warfstermeulen, Muntjeziel en Pieterziel. Zeker beeldbepoalend is sportcomplex ‘Et Meertenust’ (zie foto van de opening) SV De Lauwers. Et het dezelfde klank as de ‘Langeleegte’, een verre reis en meesttieds met de steert tussen de bienen weer noar huus. SV De Lauwers was weer es veul staarker.
Leneke Struiksma, Alie de Vries, Piet de Vries, Henk Wierenga en Geert Zijlstra
Mientje: ‘Wel halfweg is, huft niet meer te begunnen!’
