Wotter of bier?
Wel mij de keuze geft of ik wotter of bier wil, dut me noadenken. Want ik wil niet altied wotter, mor ok niet altied bier. Bier vien ik t lekkerst as t warm weer is, Mor bij kolle huf ik gien bier. Ik mag groag op e tribune zitten bij de FC, mor as ik n dikke jas aan hemmen moet, kinnen ze mij niet bliede moaken met n potje bier. t Hangt dus van e omstandigheden òf woar of ik veur kies.
Nou is bier ok eigelk wotter, ik schat zo ien dat elk bierke veur 99% uut wotter bestijt. Et schient dat et al eeuwen dronken wordt, al vanòf 4500 veur Christus. t Eerste bier recept dateert van 3900 veur Christus. Der binnen al hiel wat hectoliters bier deur de moagen van de mensheid stroomt. Bier word brouwen, der is sproake van n hoge of lege gisting, bier moet gisten en sukkers speulen doarbij n grote rol. Gerst is meestal noast wotter et hoofdbestanddeel, al worden der ok andere groansoorten bruukt en natuurlek hop en gist
(Foto: Beeldbank Groningen, M.A. Douma, Cafe-Bar Trefpunt in Lutjegast)
Ien welk land je bier drinken, moakt ok verschil. Ien ons eigen land drinken we voak n pilsje, t liefst met n schuumkroag van twee vingers dik. Dit bier von zien oorsprong ien Pilzen ien Tsjechië. Mor andere soorten worden steeds populairder en zo zit der ien Grodegast een importeur die biertjes van over de heule wereld ienkocht en verkocht.Ien België en Engeland hemmen ze weer n hiele andere biercultuur, doar binnen de twee vingers schuum van ondergeschikt belang.Trappisten mochten groag heur eigen bier brouwen en verkochten dat ok, ok ien e tegenwoordege tied nog. En et mag allinneg trappistenbier noemt worden, as t ok echt uut n klooster komt en volgens strikte regels brouwen wordt. De handel het doar wat op vonden en verkocht nou ok abdijbier.
Ien e middeleeuwen kon je beter bier drinken dan wotter. Wotter was voak ongezond deur alle bacteriën die der ien zatten en doar wer je gauw ziek van, bier was bewarkt en toen gezonder dan wotter. Dus logisch dat mensen meer bier dronken, ok lutje kiender, al had dat bier voak wel n leger alcoholpercentage. De industriële revolutie zörgde der veur dat er aal meer bier brouwen werd, de brouwerijen werden groter en de lutje brouwerijen verdwenen, der viel niet tegen op te concurreren. Et bier wer ok goedkoper deur de grode schoal woarop et produceerd werd. Toch zie je tegenwoordeg ok weer n omgekeerde trend omdat echte liefhebbers de kleine brouwerijen weer meer wieten te waarderen. Voak binnen ze begonnen as hobbyist, mor de liefhebberij groeide uut tot kleinschoalege brouwerijen. De òfzetmarkt is niet groot, mor groot genog om der n bestoan uut te hoalen. Ok ien t noorden van t land vienen we zukke brouwerijen, met voak een eigen proeflokoal.
Noast bier met alcohol binnen der nou ok genog soorten zunder alcohol. t Is veur de minsen die dit lekker vienden een goed alternatief en dankzij dizze bieren maggen de grode producenten ok recloame moaken, woar dat veur alcoholholdende bieren verboden is. Ons grootste Nederlandse merk zie je dan ok regelmoateg veurbij kommen bij sportwedstrieden, mor altied met de 0.0 variant. En veur Buckler huft dat niet meer, dat het Youp van ’t Hek persoonlijk de nek omdraait ien e ollejoarsconference van 1989, hij riep gewoon dat et niet te zupen is. t Schient dat Freddy ooit zeit het dat dizze conference de brouwerij 400 miljoen gulden kost het. Mor ze binnen weer terug met heur 0.0 variant.
Eelke Solle
Mientje: Drink met moate(n)