Snipspoel
Zundagmiddag, t is mooi weer, dus mor even weer n rondje kuiern. Ik besluut dat ik gewoon, recht uut recht aan, over de Provincioaleweg van Kornhörn en e Penne noar Surhuusterveen lopen goa. Ien Kornhörn zie ik n klein wottertje met n mooie fontein der ien. De fontein spuit et wotter meters hoog. De Grunningse vlag wappert der veur, n mooi ploatje doar aan e “De Witsreed”.
Even loater fietsen me drie jongens veurbij, ik schat ze om de elf, twaalf joar, ze zeggen heul vriendelek goeidag. Ik zeg ok heul vriendelek goedemiddag terug, snotverdrie denk ik drie stappen verder: ik moet gewoon ‘Moi’ zeggen. t Is ok gien wonder dat de kiender gien Westerkwartierse woorden meer kennen as wij ze altied ien t Nederlands antwoorden.
De jongens hebben een vishengel over t stuur hangen. Achter op e fiets, onder de snelbienders hemmen ze een kistje met visbeneudigdheden denk ik, meschien ok wel wurms of moaden.
Goan jim vissen, zol n domme vroag west wezen. Ik kin beter de vroag stellen: “Woar goan jim vissen jongs?” n Poar stappen verder loop ik veurbij de Snipsreed, valt ok nog net onder Kornhörn.bAh, die jongs goan natuurlek noar de Snipspoel om te vissen, denk ik bij mezulf.
De Snipsreed en vermoedelek ok de Snipspoel hemmen heur noam te danken aan de familie Snip die doar vroeger woond het.
De Snipsreed, een old zandpad, lopt van e Provincioaleweg noar t zuden en komt uut op t fietspad de Leidiek. Bijna op t enne loop je dan veurbij de Snipspoel, n prachteg mooi plakje. De Snipspoel is niet zomor een meertje, mor n biezunder stukje landschap met n echte pingoruïne. t Landschap bestijt uut landerijen met holtwallen en leit vlakbij is t Curringherveld. De pingoruïne is nou eigendom van Staatsbosbeheer.
Op t veldje noast de pingoruïne stijt n klein schuulhutje, veur as je overvallen worden deur n regenbui. Mor t is ok n prachtege plak om te picknicken, of om gewoon even rusteg zitten te miemern. Ien dit heule gebied kin je ok mooi fietsen en kuiern, t Westerkwartier Pluspad lopt er ok laans.
De Snipspoel is dus n pingoruïne, dat betekent dat et ooit een pingo west het.
Pingoruïnes binnen zeldzoam ien Nederland, hoewel der ien t noorden best nog wel een aantal binnen. Ien t gebied bij Kornhörn en e Penne binnen der, as je op Google-maps kieken, of as je deur dit gebied lopen of fietsen, zo’n stuk of vijf van die ronde wotterplassen te vienden.
Een pingo is n iesheuvel uut de leste Iestied, dat is heul lang leden, meer dan 15.000 joar. Toen t ies onder de iesheuvel begon te smelten, die bedekt was met aarde, zakte de heuvel ien en bleef der een ronde kuul met wotter over. Dat noemdene ze een poel of n dobbe. Dat verkloard ok de ronde vörm van zo’n olle wotterplas. Voak binnen ze ok nog behoorlek diep, summege wel drie tot zeuventien meter.
Insecten, salamanders en kikkers denken dat ze ien t Paradies beland binnen as ze hier omvliegen en krupen. Ien t wotter leven ok vissen, zoas karpers, voorntjes, boars en ok wel snoeken. Omdat de poel zo diep is, kinnen de vissen ok ien e winter overleven.
De jongs op e fiets zollen der hier heul wat aan e hoak sloagen kinnen
Ik heb ok even aan Chatgpt vroagd woar de noam Snipsreed en Snipspoel vot kommen.
De noamen zollen verwiezen noar de wottersnip, de vogel die hier heul veul veurkomt.
De Snipsreed zol ok goed te verkloaren wezen volgens Chatgpt.
t Is n wegje ien t butengebied tussen de Penne en Kornhörn wat lopt deur nat land.
Snip zol weer kommen van de wottersnippen en de reed zol riet betekenen,
Soamen zol et betekenen “smalle weg deur het snippen en rietgebied.
t Is wel grappeg en t bewiest ok mor weer es dat je niet alles loven moeten wat google of chatgpt je verteld. Je moeten zulf op onderzoek uut!
Leneke Struiksma
Mientje: “Et is niet aal gold dat er blinkt!“