VRIJ EN BLIJ!
t Is weer tied veur vekaansie. As de grode dag aanbrekt, binnen Gerard en Greetje al om 5 uur van t berre òf. Ze huven niet veul meer doen want de caravan stijt al ienpakt op e oprit.
De bedoeling is om de eerste dag een flink stuk Duutsland te pakken en de tweede dag wat rusteger aan, richting eerste camping ien Slovenië.
t Gijt wonderwel, mor liefst 800 kilometer rieden ze en goan dan op zuuk noar n plakje om te overnachten. De volgende dag goan ze wat loater vot, want zo ver huven ze niet meer. Dizze keer gijt et niet zo vlot, et zit ze flink tegen, dikke files en dus flinke vertroaging. En t wordt ok nog es slecht weer, de stemming zakt tot et nulpunt. t Is al flink ver ien e oavend as ze op n camping aankommen, de regen vaalt nog altied met bakken noar beneden. Gauw de pootjes uutdraaien en mor vroeg op berre zeit Gerard.
As er de volgende mörgen wakker wordt stijt de zun hoog aan e hemel en braandt er al toe t berre uut.Vlug trekt de körte boksem uut e kast en ropt aan Greetje dat er broodjes hoalen gijt. Eenmoal onderwegens komt er n man tegen, stokbrood onder de arm en doar onder zigt er nog n klein stokbroodje, mor as Gerard wat beter kikt zigt er dat de man hielemoal gien kleren aan het. Is dat normoal hier? Et voelt wat ongemakkelk veur Gerard en hij gijt met zien croissants snel weer richting de caravan. Greetje is krekt wakker en Gerard vertelt heur wat er zien het. We moeten mor gauw weer vot zeit er, ze lopen hier allemoal ien e blote kont. Is dat zo? zeit Greetje en trekt et gerdien omhoog met zigt ze de buurvrouw veurbij kommen, taske met toiletspullen ien e haand, mor verder niks aan. Ik denk dast geliek hest zeit Greetje, dit is n noaktcamping. Mor hoe slim is dat met dit mooie weer? Greetje pakt heur toiletspullen en vot is ze.
Gerard zet ondertussen et toaveltje buten en pakt de ontbijtspullen. Alles nog met e broek aan. As Greetje terugkomt, leit ze n handdoekje op heur stoel en gijt er zo met e blode kont op zitten. Zo heurt dat zeit ze, nooit zomor zitten goan, eerst n handdoekje der onder. Moest ok doen Gerard ! Oarzelend dut Gerard de broek uut. ‘Wiest wat et is, as elkeneen niks aan het, vaalt et niet op. Mor as je as enege een broek aan hemmen, dan vaal je op en word je bekeken’ zeit Greetje. Veur hoeveul nachten hest boekt? Mor veur één, et was guster zuks min weer, dat ik docht, hier blief we niet lang. Doe der mor drie bij, et is hier mooi en es kieken hoe of t ons bevaalt om op zo’n camping te weden. Vanmiddag goan we noar t zwembad, kin-we de bikini en de zwembroek ien e kast leggen loaten, hoe makkelk is dat ?En as Gerard loater noar de WC moet en zunder kleren hin lopt, vaalt et hum op dat niet één op hum let. Hij zigt van alles om hum hin, ien allerlei moaten, mor hij vernimt dat et hum niet zoveul dut. Et geft hum een gevoel van vrijheid.
Wiest wat zeit er tegen Greetje as er weerom komt, ik boek een heule week bij. Hier wil ik vot niet weer weg, ik voel me nou al compleet op mien gemak’. Ah prima antwoordt Greetje, ik vien et ok heerlijk hier. We moeten der allinneg wel om denken dat we ons goed iensmeren met zunnebrandcrème, veural op die plakken die aans nooit de zun zien. Ik moet er niet aan denken dat we ons doar verbranden. En streeploos bruun worden liekt me ok wel wat’.
Eelke Solle
Mientje: ‘We binnen allemoal mensen as we bloot binnen!’