Avvekoaten
De bietencampagne is al n poar week op dreef. Dikke bulten bieten op t laand en Tik-Tok-Tammo beleeft weer de mooiste weken van t joar. Rond Hoogkerk de overbekende geur van t fabriek. t Is gelukkeg weer zo ver, nou mor hopen veur de boeren dat et sukkergehalte goed is.
t Was vanneweek glibbereg op e binnenwegen vanwege dat de boeren drok bezeg binnen met bieten, eerabbels en mais. Nou binnen de meesten wel zo slim dat ze borden bie de weg zetten woarmet ze de weggebruker woarschouwen dat et glad weden kin deur die modder. Dat is huul verstandeg want as er ongelukken van kommen dan kin je as boer verantwoordelek steld worden.
Ik heurde vanneweek n avvekoat die doar even lekker op deur ging. Dat je der as boer wel huul tuuk op wezen moeten en aantonen dat je je uterste best doan hemmen om gevoar te veurkommen. Mor volgens mij bin je as weggebruker net zo verantwoordelek. Want et is logisch dat de wegen smirreg worden as boeren doar gebruuk van moaken. As ze je dan netjes woarschouwen dan vien ik dat wij, as gewoon volk ons riegedrag doar op aanpassen moeten. Dit is natuurlek voer veur avvekoaten, want wat die wel niet verzinnen kinnen om een zoak deur te drieven, doar binnen de enden vanòf en de stukken tussen weg.
De goeien niet te noa gesproken, mor mien ervoaring met avvekoaten is niet zo best. De meeste avvekoaten zien heur klanten as n soort flappentap. Even een briefke schrieven en de flappen geld begunnen der uut te rollen. En dat wieten ze dan beheurlek laank te rekken zodat ze uren schrieven kinnen. En dat kinnen ze! Zunder dat je der zicht op hemmen. Ze moeten zich altied ienlezen en ze moeten stukken schrieven enzovoort. Doar veur rekenen ze dan tarieven, doar lusten de honden gien brood van. Een poar honderd euro ien t uur is niks. Doar bovenop kommen dan nog de kantoorkosten, want ja die medewerkers op kantoor kosten ok geld en t papier en de printer binnen ok niet om e nugt.
Mor t slimste is dat ze t altied weer presteren om van een zoak een nije zoak te moaken. En dat ze je dan huul veul kans van sloagen geven. Dan gijt de flappentap weer open. As t vonnis van e rechtbank negatief uutpakt, dus as je verloren hemmen, dan komt et leste briefke met de mededeling dat het ze spiet dat ze gien beter bericht hemmen. Meschien is t ok om die reden dat er goenent binnen die veurschotten berekenen. Dus nog veur dat ze wat doan hemmen leit er al n reken op e mat, zodat ze zeker binnen van e cinten.
Nogmoals. der zallen goeien wezen, die veur je deur t vuur goan, mor ik bin ze nog niet tegenkommen. Starker nog, ik heurde van één die zag hiel wat anders ien zien klant. Die klant was n mooie doame die hij veurzichteg ienpalmde. Althans, dat probeerde der. Hij liep, as n hondje achter heur aan. Hij bood heur, ien ruil veur heur aandacht, zelf aangepaste tarieven aan! Kwoaleker kin t niet volgens mij. Nou is dit natuurlek wel n extreem geval. Hoe het ok zij, volgens mij moet je uutkieken as je n avvekoat ien e arm nimmen. Moak van te veuren keiharde ofsproaken over tarieven en over wat je bereiken willen. Dudeleke doelomschrieving en ok wat de consequenties binnen as je de zoak verliezen.
En doarnoast, as er modder op e weg leit, dan passen wij ons gedrag aan. Dat schilt n hoop gedoe en juridisch geneuzel. En dan worden de boeren der niet de dupe van.
Piet de Vries
Mientje: ‘Hier binnen de enden vanòf en e stukken tussen weg!’