Ik proat plat - Host één delknapt ien Pieterzijl
Ruum honderd joar leden het hum ien Pieterziel t volgende ofspeuld. Ik heb het rechtstreeks heurd van een getuge (en met-schuldege) Reitze van der Weide, mien pabbe. Wat i-der dan toen gebeurd? Luuster en huver…ik vien t wel slim.
Ien e eerste wereldoorlog wadden der ien Nederland een hiel nust vluchtelingen, veuraal uut België. Der kwammen ok goenent ien Pieterziel, die warkten dèr bij de boer. Dat was ja krekt wat veur de opschoten jeugd, dus die hielden nogal es toe bij Sjan Pière en Gaston. Die leeftiedsgenoten kwammen uut Wallonië, ze proatende dan ok Fraans, vanzels. Ik denk dat ze bij dezelde boer wadden as mien pabbe, Reitze of zien kammeroad Jan Mook. Die bongels leerden onder t wark ok wat Fraans van die vrimdelingen. En, jawis, zodoende kon Reitze zesteg joar loater, nog dizze Fraanse klanken achternander uutspijen:
Ün, deu, troa, katt, kattervin deu, kattervindoeze. Woe zij kontann poer koesjee awikmwa. Akkanonne wiede witsit, siede wiede singpartie, la mèson dela fermeture.”
Wel as t kin, die vertoalt et mor, ik denk, dat et niet almoal zo botte hoogstoand is; zo heur ik er ien: voulez vous coucher avec moi? ( Ja,ja, en dat mozzen ze dan mor tegen de meid zeggen, en zo) en dan die Belgen mor gniezen.
Ja, mor nou dit: die Belgen, grode verdaarvelingen eileks, hadden ok woapens metnommen. Ik wiet niet hoe t ze der aankwammen, mor Jan en Reitze hadden een pistool van ze kregen of kocht. Met kugels der ok nog bij. Die jongens wadden op n zundagmiddag ien t huus (rechts op de foto) van vrouw Mook, een weduwvrouw en de moeke van Jan. Dèr zatten ze wat om te griemen met et pistool en e kugels, zo ien e koamer, aan e etenstoavel. Vrouw Mook lag ien e bedstee, zij was niet aal te goed. De deuren van e bedstee had ze dicht doan. En dan die jongens mor met dat pistool ien e weer.
“Kiek, met dit paltje kinst hum op veileg zetten en dan…. O, wat is dat dan? Volgens mij, ja, ja, kinst der die dikke kugels iendoen ja. Ik heb toch gienent votsleept? Wat zee Gaston verder nog?”
Jan zien moeke heurde dat almoal aan vanuut de bedstee en begon te woarschouwen:
‘Jongens, hol op met dat pistool! Aant gebeuren der grode ongelukken. Ik maag heelmoal niet over dat speulen van jim.
‘Moeke, wij doen ja niks, wij zitten allinneg mor te zien hoe of dat et warkt.’
‘Doe dat pistool vot, dat magen jim niet eens ien e huus hemmen. Moet ik et nog weer zeggen? Vottermèt!’’
‘Wij doen ja niks, moeke, hol op met dat gehavvel.’
‘Ik wil t niet, nee, ik wil hier gien pistool ien e huus, breng die brud weerom noar die dikke lovverds, die butenlanders.’
‘En nou is t oflopen, verdold!’
En toen volgden de historische woorden:
‘Eén, die at op bèrre leit, die moet hum stilholden!!’
t Pistool wer hoog richt, noar de bovenkant van e bedstee en ofschoten! Wammmmmm!!!
Een kugelgat ien e bedsteedeur!
Gelukkeg is t goed oflopen, mor ok al is t nou honderd joar leden, t blift aal n minne, stomme streek van die hampels. t Liekt nargens op, toch?
Bouwe van der Weide (old ienwoner van Pieterziel, woont al joaren ien Flevoland, mor stuurde ons n compleet - woar gebeurd - verhoal ien zien Westerkwartiers)
- Gehavvel – gezeur
- Verdold – potverdorie
- Dèr - doar
- Dikke lovverd- dikke vadsige jongen/lomperd
- Gniezen - gniffelen
- Vottermet - weg ermee
Vanaf volgende week in deze rubriek een serie van verhalen die direct of indirect met de Tweede Wereldoorlog in het Westerkwartier te maken hebben. Mien Westerkwartier is benieuwd naar verhalen uit deze tijd van lezers. Die kunnen ingestuurd worden naar info@mienwesterkwartier.nl.
Mientje: Geef op dat ding, gien kiender met schietgeweren!